Rövnəq İmran oğlu Həsənzadə 3 yanvar 1975-ci ildə Naxçıvan şəhərində anadan olub.
1991-1996-cı illərdə Azərbaycan Dövlət İnşaat Mühəndisləri Universitetində, 1999-2002-ci illərdə Azərbaycan Dövlət Mədəniyyət və İncəsənət Universitetində təhsil alıb.
1997-1998-ci illərdə Azərbaycan Silahlı Qüvvələrində hərbi xidmətdə olub.
Təhsil aldığı illərdən başlayan əmək fəaliyyətində Azərbaycan Dövlət Televiziya və Radio Verilişləri Komitəsində rejissor köməkçisi, Azərbaycan Dövlət Akademik Milli Dram Teatrının texniki heyətində, C.Cabbarlı adına “Azərbaycanfilm”Kinostudiyasında rejissor köməkçisi, “Space” Müstəqil Televiziya və Radio Yayımları Şirkətində “Musiqi və əyləncəli proqramlar” departamentinin böyük rejissoru, C.Cabbarlı adına İrəvan Dövlət Azərbaycan Dram Teatrında quruluşçu rejissor, İctimai Televiziya və Radio Yayımları Şirkətində quruluşçu rejissor, “Musiqi və əyləncəli proqramlar” departamentinin direktor müavini və direktoru, Azərbaycan Televiziya və Radio Verilişləri Qapalı Səhmdar Cəmiyyətində ali kateqoriyalı rejissor, “Musiqi və əyləncəli proqramlar” redaksiyasının baş rejissoru işləyib. 01 iyun 2017-ci il tarixindən Mədəniyyət Kanalının bədii rəhbəri vəzifəsində çalışır. Azərbaycan Respublikası Prezidentinin 06 noyabr 2019-cu il tarixli sərəncamı ilə “Əməkdar mədəniyyət işçisi” fəxri adı ilə təltif olunub.
2004-cü ildən Mədəniyyət Nazirliyinin Azərbaycan Respublikası Prezidentinin sərəncamı ilə keçirdiyi dövlət tədbirlərində rejissor kimi çalışıb.
Azərbaycan Televiziyasının Mədəniyyət Kanalının Azərbaycan Respublikası Mədəniyyət Nazirliyi ilə birgə Heydər Əliyev Mərkəzində,Heydər Əliyev Sarayında, Azərbaycan Dövlət Akademik Filarmoniyasında, Beynəlxalq Muğam Mərkəzində keçirdiyi müxtəlif musiqi festivallarının, müsabiqələrin, görkəmli bəstəkarların, şairlərin, incəsənət xadimlərinin silsilə yubiley, yaradıcılıq və xatirə gecələrinin quruluşçu rejissoru olubdur. Televiziyada hazırlanan müxtəlif janrlı proqramların, dövlət tədbirlərinin və bayram konsertlərinin də quruluşçu rejissorudur. Respublikada fəaliyyət göstərən dövlət teatrlarının çoxsaylı tamaşalarını lentə alıb və həmin tamaşalar Azərbaycan Televiziyasının Qızıl Fondunda saxlanılır.