Respublika Gənclər Kitabxanasında “17 Noyabr – Dirçəliş və Birlik Günü” adlı biblioqrafik icmal, “Oyanışdan Zəfərə: Müstəqil Azərbaycanın təməl tarixi” adlı təqdimat və “Dirçəlişdən Zəfərə gedən yol” adlı ənənəvi kitab sərgisi hazırlanıb.

 

Kitabxanadan bildirilib ki, materiallar Milli Dirçəliş Gününün tarixi mahiyyətini, 1988-ci ildə başlanan xalq hərəkatının Azərbaycan dövlətçiliyinin formalaşmasındakı rolunu, milli azadlıq ideyalarının inkişafını və xalqımızın birlik ənənələrini geniş oxucu auditoriyasına çatdırmaq məqsədilə keçirilib.

Materiallarda 1980-ci illərin sonlarında Sovet İttifaqında baş verən siyasi və ictimai proseslər, Ermənistanın Azərbaycana qarşı ərazi iddiaları, Qarabağ ətrafında yaranmış gərginlik, xalqın milli hüquqlarının müdafiəsi uğrunda mübarizəsi, Azərbaycan tarixində yeni mərhələnin əsasını qoyan 1988-ci il noyabrın 17-də Bakının Azadlıq meydanında başlanan ümumxalq mitinqi haqqında geniş məlumat verilir. Təqdimatda milli azadlıq hərəkatının tarixi əhəmiyyəti ilə yanaşı Azərbaycanın dövlət müstəqilliyinin bərpası və Zəfərə aparan tarixi yol da ardıcıl və vizual materiallarla əks olunur. Müasir texnologiyaların imkanlarından istifadə edilməklə hazırlanan təqdimat milli dirçəliş ideyasının, azadlıq mübarizəsinin və müstəqillik dəyərlərinin daha dolğun şəkildə təbliğinə xidmət edir.

Biblioqrafik icmalda Ümummilli Lider Heydər Əliyevin Milli Dirçəliş Günü münasibətilə Azərbaycan xalqına ünvanladığı müraciətin tam mətni, eləcə də Ulu Öndər Heydər Əliyevin, Prezident İlham Əliyevin milli birlik və dövlət müstəqilliyi ilə bağlı fikirləri yer alır.

Kitabxananın rəsmi saytında yerləşdirilən vəsaitdə tarix elmləri doktoru, professor Anar İsgəndərovun “Dirçəlişdən Zəfərə” adlı məqaləsi ilə yanaşı Azərbaycan tarixinin, dövlətçilik ənənələrinin, milli kimliyin, müstəqillik mübarizəsinin və Heydər Əliyev siyasi irsinin öyrənilməsinə həsr olunmuş müxtəlif illərdə nəşr edilmiş kitabların biblioqrafik təsviri və qısa annotasiyası da təqdim edilir. “Azərbaycanın müasir dövlətçilik tarixi”, “Modern Azərbaycanın doğuluşu”, “Azərbaycan tarixi: ən qədim dövrlərdən zəmanəmizədək”, “Tariximizin Heydər Əliyev zirvəsi”, “Azərbaycan tarixində Heydər Əliyev şəxsiyyəti” kimi nəşrlər, 2005–2025-ci illərdə dövri mətbuatda dərc olunmuş məqalələr oxuculara mövzu ilə bağlı geniş məlumat əldə etmək imkanı yaradır.

Kitabxanada “Dirçəlişdən Zəfərə gedən yol” adlı kitab sərgisi də hazırlanıb. Sərgidə Azərbaycanın milli azadlıq ruhunu, xalqımızın müstəqillik uğrunda apardığı mübarizəni, dövlətçilik tarixini və tarixi Zəfərə aparan yolu əks etdirən nəşrlər sərgilənir.