Uruqvay Şərq Respublikasında akkreditə olunmuş diplomatik nümayəndəliklərin təşkilatçılığı ilə keçirilən “Beynəlxalq Kulinariya Günü” (Día Internacional de la Cocina) tədbirində Azərbaycan milli mətbəxinin zəngin nümunələri təqdim olunub.
Bu barədə Azərbaycanın Uruqvaydakı səfirliyindən məlumat verilib.
Bildirilib ki, Azərbaycanın Uruqvaydakı diplomatik nümayəndəliyinin iştirakı ilə təşkil olunan təqdimatda milli mətbəximizə məxsus müxtəlif təamlar nümayiş etdirilərək Uruqvay ictimaiyyətinin nümayəndələrinə, diplomatik korpusun üzvlərinə və digər qonaqlara təqdim edilib.
Təqdimat zamanı iştirakçılara Azərbaycan xalqının çoxəsrlik kulinariya ənənələri, milli mətbəximizin zənginliyi və özünəməxsus xüsusiyyətləri barədə məlumat verilib. Qonaqlar Azərbaycan mətbəxinin nümunələrini dadmaq və ölkəmizin qastronomik mədəniyyəti ilə yaxından tanış olmaq imkanı əldə ediblər. Azərbaycan milli mətbəxinin təqdimatı ölkəmizin zəngin mədəni irsinin Uruqvayda təbliği, yerli ictimaiyyətin Azərbaycan mədəniyyəti haqqında məlumatlılığının artırılması və xalqlar arasında mədəni əlaqələrin genişləndirilməsi baxımından əhəmiyyətli olub.
Müxtəlif ölkələrin milli mətbəxlərinin nümayiş olunduğu tədbirdə Uruqvay ictimaiyyətinin nümayəndələri, ölkədə akkreditə olunmuş diplomatik korpusun üzvləri və digər qonaqlar iştirak ediblər. Tədbir mədəniyyətlərarası dialoqun təşviqi, milli kulinariya ənənələrinin tanıdılması və müxtəlif xalqlar arasında qarşılıqlı anlaşma və dostluq münasibətlərinin möhkəmləndirilməsi üçün əlverişli imkan yaradıb.
Azərbaycanın Uruqvaydakı diplomatik nümayəndəliyinin bu tədbirdə iştirakı milli mətbəximizin və mədəni irsimizin beynəlxalq səviyyədə tanıdılması istiqamətində həyata keçirilən mədəni diplomatiya fəaliyyətinin tərkib hissəsi olub.