Estoniyanın paytaxtı Tallində keçirilən PÖFF – “Qara Gecələr” Beynəlxalq Film Festivalı çərçivəsində azərbaycanlı qazi Kamran Baxşızadənin həyatından bəhs edən “Ad günü şamları” sənədli filminin dünya premyerası baş tutub.
Dünyanın 17 aparıcı A kateqoriyalı beynəlxalq film festivalından biri olan PÖFF-nin rəsmi müsabiqə proqramına ilk dəfə Qarabağ mövzusunda çəkilmiş Azərbaycan sənədli filmi seçilib.
Film tamaşaçılar tərəfindən maraqla qarşılanıb.
Sənədli film 2020-ci ildə könüllü olaraq Vətən müharibəsinə qatılan və doğum gününə təsadüf edən döyüşlərin birində görmə qabiliyyətini itirən Kamran Baxşızadənin həyat hekayəsindən bəhs edir. Ekran əsərində müharibənin insan taleyində buraxdığı dərin izlər, onun ağır fəsadları və gənc qazinin müharibədənsonrakı həyata uyğunlaşmaq uğrunda mübarizəsi əks olunur.
Premyera çərçivəsində Estoniyada yaşayan Azərbaycan icmasının üzvləri filmin rejissoru Murad Allahverdi və prodüseri Afaq Yusifli ilə görüşərək ekran əsəri və onun ərsəyə gəlməsi barədə fikir mübadiləsi aparıblar.
Filmin yaradıcı heyəti Kamran Baxşızadənin həyat hekayəsi vasitəsilə müharibənin insan taleyinə təsirini və onun ağır nəticələrini beynəlxalq auditoriyaya çatdırmağı qarşıya məqsəd qoyub.