Qeyd etdiyimiz kimi, 28-30 oktyabr tarixlərində qardaş Türkiyənin paytaxtı Ankara şəhərində Türk Dövlətləri Təşkilatı (TDT) Dövlət Başçıları Şurasının 13-cü Zirvə Görüşü keçirilib.

 

Görüş çərçivəsində Beynəlxalq Türk Mədəniyyəti Təşkilatının (TÜRKSOY) təşkilatçılığı ilə Prezident Sarayında TÜRKSOY-un solistlərindən ibarət möhtəşəm Qala Konserti təşkil olunub. Azərbaycan, Türkiyə, Qazaxıstan, Qırğızıstan, Özbəkistan və Türkmənistandan olan peşəkar musiqiçilərin birləşdiyi TÜRKSOY Orkestri Türk dünyasının mədəni birliyini öz zəngin repertuarı ilə müxtəlif ölkələrdə təbliğ edir.

Bu mötəbər tədbirdə Azərbaycanı "Vətən" Muğam Qrupunun solistləri – tanınmış tarzən Ruslan Zərbaliyev və kamança ifaçısı Pərviz Fərhadov uğurla təmsil ediblər. Qeyd edək ki, TÜRKSOY Xalq Çalğı Alətləri Orkestrinin üzvləri olan hər iki sənətçi Azərbaycan Dövlət Mədəniyyət və İncəsənət Universitetinin, eyni zamanda Azərbaycan Milli Konservatoriyasının müəllimləridirlər.

Tədbir çərçivəsində baş tutan konsertdə TÜRKSOY Orkestri ilə yanaşı, simfonik orkestr, hərbi orkestr və tarixi “Mehter” orkestri də iştirak edib. Konsert proqramına qatılan ölkələrin hər birinə aid milli musiqi nümunələri təqdim olunub. Təmsilçilərimizin səsləndirdiyi Azərbaycanın "Sarı gəlin" xalq mahnısı  qonaqlar tərəfindən böyük coşqu ilə qarşılanıb. Eyni zamanda solistlərimiz bəstəkar Həsən Rzayevin məşhur "Çahargah" rapsodiyasını tar və kamança alətlərində yüksək sənətkarlıqla ifa edərək tədbir iştirakçılarının zövqünü oxşayıblar.

Tədbirdə Türk Dövlətləri Təşkilatının Baş katibi Kubanıçbek Ömüralıyev, TÜRKSOY-un keçmiş Baş katibi və TÜRKSOY Orkestrinin yaradıcısı Düsen Kaseyinov, habelə Türk dövlətlərinin Türkiyədəki fövqəladə və səlahiyyətli səfirləri, nazirlər, parlament üzvləri və millət vəkilləri də iştirak ediblər.

Görüş çərçivəsində Türk dünyasının mədəniyyətinə və birliyinə göstərdiyi böyük xidmətlərə görə Düsen Kaseyinov Türkiyə Respublikasının Prezidenti Rəcəb Tayyib Ərdoğan tərəfindən Türk Dövlətləri Təşkilatının yüksək "Əlişir Nəvai adına Beynəlxalq Mükafatı" ilə təltif olunub.

Prezident Rəcəb Tayyib Ərdoğan və xanımı Əminə Ərdoğan musiqiçilərimizlə səmimi söhbət edib, onlara öz dərin minnətdarlıqlarını bildiriblər. Türkiyə Prezidenti sənətçilərimizlə sağollaşarkən: "Can Azərbaycana məndən salam söyləyin!" – deyərək, qardaş ölkəyə olan xüsusi sevgisini və ehtiramını bir daha nümayiş etdirib.

Qeyd edək ki, bir çox respublika və beynəlxalq müsabiqələrin qalibi olmuş həmyerlilərimiz Ruslan Zərbaliyev və Pərviz Fərhadov artıq 11 ilə yaxındır ki, muğam sənətimizi dünyanın bir çox ölkələrində – İtaliya, Fransa, İsveçrə, Türkiyə, Yaponiya, Estoniya, Macarıstan, Latviya, Almaniya, Qazaxıstan, Litva, Özbəkistan, Rusiya, İran, Amerika Birləşmiş Ştatları, Polşa, Birləşmiş Ərəb Əmirlikləri, Tacikistan, Ukrayna, Qırğızıstan, Türkmənistan, Şimali Kipr, Niderland (Hollandiya), Portuqaliya, Çin, Bolqarıstan, Kanada və digər dövlətlərdə keçirilən qastrol səfərlərində, möhtəşəm festival və konsertlərdə yüksək səviyyədə təmsil ediblər.