Oktyabrın 16-da İndoneziyanın Bakıdakı səfirliyinin və İndoneziya Milli Kreativ İqtisadiyyat Hərəkatının Azərbaycandakı nümayəndəliyinin (“Gekrafs Azerbaijan”) birgə təşkilatçılığı ilə “İndoneziya kulinariya diplomatiyası festivalı 2026” adlı mədəniyyət festivalı keçirilib.
Festivalın əsas məqsədi İndoneziyanın milli kimliyini, zəngin mədəniyyətini və kreativ iqtisadiyyat potensialını beynəlxalq səviyyədə tanıtmaq, eləcə də kulinariya diplomatiyası vasitəsilə İndoneziya ilə Azərbaycan arasında mədəni əlaqələri gücləndirmək olub. Tədbir həmçinin Azərbaycandakı İndoneziya diasporunun mikro, kiçik və orta sahibkarlarına (MKOS) öz kulinariya məhsullarını təqdim etmək və bazara çıxarmaq üçün imkan yaradıb.
İndoneziyanın Azərbaycandakı səfiri Berlian Helmi tədbirin təşkilini yüksək qiymətləndirərək bildirib ki, bu təşəbbüs səfirliyin mədəni diplomatiyanın inkişafı istiqamətindəki missiyasına uyğundur. Onun sözlərinə görə, kreativ iqtisadiyyat və milli mətbəx iki ölkə arasında ikitərəfli münasibətlərin möhkəmləndirilməsində mühüm rol oynayır.
Tədbir çərçivəsində qonaqlar İndoneziyanın ənənəvi yeməkləri ilə tanış olub, kulinariya nümayişlərini izləyib və ölkənin mədəni irsini əks etdirən proqramlarda iştirak ediblər.