Türkiyədəki Azərbaycan Mədəniyyət Mərkəzinin həyata keçirdiyi “Azərbaycan nişanələri dünyada” layihəsi çərçivəsində Xalq rəssamı Arif Hüseynovun “Xoşbəxt Azərbaycan ailəsi” əsəri Ankara Rəsm və Heykəltəraşlıq Muzeyinin daimi ekspozisiyasına daxil edilib.
Türkiyənin Mədəniyyət və Turizm Nazirliyinin dəstəyi ilə reallaşan layihə çərçivəsində rəsmin muzeyin inventarına alınması və daimi nümayiş etdirilməsi barədə qərar qəbul olunub. Bununla əlaqədar Xalq rəssamı Arif Hüseynov yaratdığı “Xoşbəxt Azərbaycan ailəsi” əsərini Ankara Rəsm və Heykəltəraşlıq Muzeyinə hədiyyə edib.
Milli mədəniyyətimizi və mənəvi dəyərlərimizi tərənnüm edən bu tablo Azərbaycan xalqının ənənəvi ailə modelini və ailə birliyini bədii boyalarla əks etdirir. Əsərin əsas ideyası Azərbaycan ailəsinin sevgi, həmrəylik və milli dəyərlərə sədaqət ruhunda yaşamasını göstərməkdir. Rəssam özünəməxsus dəst-xətti ilə yaradılan bu kompozisiya vasitəsilə ailənin cəmiyyətin ana sütunu olduğunu, cəmiyyətin mənəvi gücünün məhz sağlam və xoşbəxt ailələrdən qaynaqlandığını vurğulayır. Əsər çağdaş Azərbaycan təsviri sənətində ənənəvi milli üslubun parlaq nümunələrindən biri kimi dəyərləndirilir.