Montrö səhnəsində Azərbaycan mədəniyyətinin təntənəsi

İsveçrədə keçirilən 80-ci “Septembre Musical Montreux–Vevey” festivalı çərçivəsində Azərbaycan mədəniyyətinin geniş proqramla təqdimatı davam edir. Ölkəmizin beynəlxalq yubiley festivalında fəxri qonaq kimi iştirak etməsi milli incəsənətimizin dünya miqyasında təbliğatı baxımından xüsusi əhəmiyyət kəsb edir.

Sentyabrın 14-də Montrö şəhərinin məşhur “Auditorium Stravinski” səhnəsində Azərbaycan artistlərinin iştirakı ilə təntənəli qala-konsert təşkil olunub.

Mədəniyyət Nazirliyindən bildirilib ki, iki hissədən ibarət proqram Üzeyir Hacıbəylinin “Koroğlu” operasından “Uvertüra” ilə açılıb. Əsər Fuad İbrahimovun dirijorluğu ilə Ü.Hacıbəyli adına Azərbaycan Dövlət Simfonik Orkestri tərəfindən böyük şövqlə ifa olunub.

Daha sonra orkestrin müşayiəti ilə Qara Qarayevin “Yeddi gözəl” baletindən “Vals”, Aqşin Əlizadənin “Cəngi”, Fikrət Əmirovun “Azərbaycan kapriççiosu”, Niyazinin “Konsert valsı” və Arif Məlikovun “Məhəbbət əfsanəsi” baletindən “Türk qızlarının rəqsi” səsləndirilib.

Musiqi gecəsində Xalq artisti Alim Qasımov “Qaragilə”, Fəqan Ələsgərov (balaban) və Mədinə Şahgəldiyeva (kamança) “Sarı gəlin” xalq mahnılarını, Azərbaycan Dövlət Rəqs Ansamblı isə Eldar Mansurovun “Odlar yurdu” və “Uzundərə” rəqslərini təqdim edib.

Proqramda, həmçinin Samir Cəfərov Ü.Hacıbəylinin “Sevgili canan”, Murad Hüseynov F.Əmirovun “Min bir gecə” baletindən “Şəhrizadın şənliyi”, Yusif Eyvazov F.Əmirovun “Sevil” operasından “Balaşın ariyası”, Afaq Abbasova Niyazinin “Arzu”, Ceyla Seyidova və Elvin Hoca Qəniyev Niyazinin “Rast” simfonik muğamı, Elmina Həsənova F.Əmirovun “Sevil” operasından “Dilbərin ariyası”, Əhəd Ağayev “Bayatı-Şiraz” muğamı, Sevda Ələkbərzadə İ.Sarabski və Ş.İmanovun müşayiəti ilə “Caz kompozisiyası”, Elmina Həsənova və Samir Cəfərov “Arşın mal alan” operettasından duet, Şəhriyar İmanov H.Rzayevin “Çahargah rapsodiyası”, Yusif Eyvazov və Afaq Abbasova isə T.Quliyevin “Bakı haqqında mahnı” əsərlərini səsləndiriblər.

Qala-konsert bütün solistlərin birgə təqdimatında Müslüm Maqomayevin “Azərbaycan” mahnısı ilə yekunlaşıb.

Mədəniyyətimizin təntənəsinə çevrilən bu gecə xarici sənətsevərlərdə zəngin təəssürat yaradaraq böyük alqışlarla qarşılanıb.