Filologiya üzrə fəlsəfə doktoru, dosent Cahid Kazımovun “Suveren Azərbaycanda dil situasiyası” adlı kitabı çap olunub.
Nəşrdə etnodil və dil situasiyası məsələləri sosiolinqvistikanın mühüm tədqiqat istiqamətlərindən biri kimi araşdırılır, Azərbaycanda dil situasiyasının tarixi inkişaf mərhələləri elmi-nəzəri baxımdan təhlil edilir. Ölkədə dil situasiyasının müəyyənləşdirilməsi yolları göstərilir, “sosial-kommunikativ sistem”in iyerarxiyası və komponentləri dəqiqləşdirilir.
Kitab Azərbaycan Milli Elmlər Akademiyasının Nəsimi adına Dilçilik İnstitutunun Elmi şurasının qərarı ilə çap olunub. Əsərdə Azərbaycanda dil situasiyasının inkişaf dinamikası, ona təsir göstərən obyektiv və subyektiv amillər, dil situasiyasının əsas formaları və tipologiyası geniş şəkildə tədqiq olunur. Kommunikativlik dil situasiyasının əsas xüsusiyyətlərindən biri kimi nəzərdən keçirilir.
Kitabda, həmçinin Azərbaycanda yaşayan azsaylı xalqların dillərinin kontinuum səviyyələri araşdırılır. Dil kontinuumu dilin kəskin sərhədlərlə ayrılmayan, bir-biri ilə qarşılıqlı və davamlı əlaqədə olan mərhələ və qatlarını ifadə edən anlayış kimi izah olunur. Tədqiqatda dil siyasəti ilə dil situasiyası arasındakı qarşılıqlı əlaqələr təhlil edilir, bunun əsasında Azərbaycandakı dil mühitinin bütöv mənzərəsi təqdim olunur.
Nəşrdə müasir Azərbaycan cəmiyyətində baş verən dil proseslərinə, dövlət dili ilə ölkədə istifadə olunan digər dillərin qarşılıqlı münasibətlərinə və çoxdilli mühitin sosiolinqvistik xüsusiyyətlərinə də elmi yanaşma ortaya qoyulur.
“Suveren Azərbaycanda dil situasiyası” monoqrafiyası Azərbaycanın müasir dil mənzərəsinin, ölkədə həyata keçirilən dil siyasətinin və müxtəlif dillərin funksional mövqeyinin öyrənilməsi baxımından elmi əhəmiyyət daşıyır.
Kitab dilçilər, filoloqlar, sosiolinqvistlər, tədqiqatçılar, ali məktəb müəllimləri və tələbələr, eləcə də Azərbaycanın dil siyasəti və dil mühiti ilə maraqlanan oxucular üçün nəzərdə tutulub.