Qazax rayonunun Yuxarı Salahlı kəndində yerləşən Səməd Vurğun Poeziya Evində Azərbaycan Milli Elmlər Akademiyası Mərkəzi Elmi Kitabxanasının (MEK) Xalq şairi Səməd Vurğunun 120 illiyinə həsr etdiyi elektron resursun təqdimatı keçirilib. Tədbir çərçivəsində MEK-in bir qrup əməkdaşı Qazax rayonuna ezam olunub.
Bu barədə Mərkəzi Elmi Kitabxanadan məlumat verilib.
Tədbirdə çıxış edən poeziya evinin direktoru Mətanət Rəhimova Azərbaycan Prezidentinin “Xalq şairi Səməd Vurğunun 120 illiyinin qeyd edilməsi haqqında” Sərəncamın əhəmiyyətini xüsusi vurğulayıb. O, şairin ədəbi irsinin hər zaman yüksək səviyyədə qiymətləndirildiyini bildirərək, bu cür tədbirlərin şairin yaradıcılığının dərindən öyrənilməsində, təbliğində və gənc nəslə milli-mənəvi dəyərlərin aşılanmasındakı müstəsna rolunu qeyd edib.
MEK-in direktor müavini Oruc Quliyev çıxışında bildirib ki, Xalq şairi Səməd Vurğunun anadan olmasının 120 illiyi münasibətilə AMEA-nın prezidenti akademik İsa Həbibbəylinin ideya müəllifliyi ilə şairin zəngin həyat və yaradıcılığına həsr olunmuş elektron resurs hazırlanaraq MEK-in saytına inteqrasiya edilib və oxucuların istifadəsinə verilib. Layihə ilə MEK-in saytındakı “E-xidmətlər” bölməsinin “E-layihələr” hissəsində tanış olmaq mümkündür.
O.Quliyev məlumat bazasının yazıldığı yaddaş kartını poeziya evinin direktoruna hədiyyə edib.
Sonra MEK-in Rəqəmsal kitabxana və süni intellekt şöbəsinin müdiri Şəfəq Əliyeva Səməd Vurğun məlumat bazasının təqdimatını edib. O, qeyd edib ki, bazada şairin müəllifi olduğu, eləcə də həyat və yaradıcılığına həsr edilmiş 100-ə yaxın kitab, 21 avtoreferat, 21 video, 109 şəkil, 4 film və tamaşa, həmçinin 97 məqalə, 27 tərcümə əsəri və təqribən 200-ə yaxın şeirin PDF formatı yerləşdirilib. Bazaya, həmçinin 6 sənədli-publisistik film, şairin şeirləri əsasında bəstələnmiş 17 mahnı və MEK əməkdaşı Nailə Əmiraslanın səsləndirdiyi 32 audioşeir daxil edilib.
Tədbirdə MEK-in Arxiv şöbəsinin müdiri Rəqsanə Nağıyeva Səməd Vurğunun zəngin yaradıcılığı və ədəbi irsi haqqında məlumat verərək bildirib ki, şairin əsərləri milli-mənəvi dəyərlərin formalaşmasında mühüm rol oynayır və bu gün də aktuallığını qoruyur.
Digər çıxış edənlər Səməd Vurğunun yaradıcılığından, Qazax ədəbi mühitinin inkişafındakı xidmətlərindən danışıb, MEK tərəfindən hazırlanan elektron resursu yüksək qiymətləndiriblər.
Tədbir bədii hissə ilə davam edib.