“Türk dünyasına səyahət” - Türk xalqlarının irsi, ortaq mənəvi dəyərləri və qardaşlıq əlaqələri təbliğ olunur

İyunun 9-da Xəzər rayonunun Şüvəlan qəsəbəsində yerləşən 156 nömrəli tam orta ümumi təhsil məktəbində “Türk dünyasına səyahət” adlı tədbir təşkil olunub.

Milli Məclisin Mədəniyyət komitəsinin təşəbbüsü, Bakı Şəhəri üzrə Təhsil İdarəsi və Xəzər Rayon İcra Hakimiyyətinin əməkdaşlığı ilə keçirilən layihənin məqsədi türk xalqlarının zəngin tarixi-mədəni irsinin, ortaq mənəvi dəyərlərinin və qardaşlıq əlaqələrinin təbliğidir.

Tədbir çərçivəsində məktəbin həyətində türk dövlətlərinin milli-mədəni irsini, ənənələrini və mətbəx nümunələrini əks etdirən çadırlar qurulub.

Daha sonra şagirdlərin ifasında türk xalqlarına məxsus musiqi və rəqs nömrələri, milli oyunlar və müxtəlif bədii kompozisiyalar təqdim olunub.

Tədbirdə Milli Məclisin deputatları, Xəzər Rayon İcra Hakimiyyətinin rəhbərliyi, ölkəmizdə fəaliyyət göstərən türk dövlətlərinin fövqəladə və səlahiyyətli səfirləri və Bakı Şəhəri üzrə Təhsil İdarəsinin nümayəndələri iştirak ediblər.