Almaniyanın Berlin şəhərində Türk xalqlarının, türkdilli dövlətlərin elmi-mədəni irsi, dünya mədəniyyətinə və elminə töhfələrinə həsr olunmuş beynəlxalq konfrans keçirilib.
Tədbir Azərbaycanın Berlindəki Mədəniyyət Mərkəzində təşkil olunub. Belə bir tədbirin keçirilməsində əsas məqsəd TÜRKSOY-un, digər həmkar və tərəfdaş təşkilatlarla, eyni zamanda, Türk dövlətlərinin Berlindəki səfirlikləri ilə birgə ortaq mədəniyyətimizin yerli ictimaiyyətə çatdırılması olub.
Tədbirdə çıxış edənlər Türk Dünyasının dünya mədəniyyətində, elmində və digər sahələrdə böyük tarixi rol oynadığını, bu zəngin irsin mütəmadi qaydada təbliğ olunmasının önəmini vurğulayıb, belə tədbirlərin ümumi işə ciddi töhfə verəcəyini bildiriblər. Eyni zamanda, Türk Dünyasının gücünün onun birliyində olduğu fikrini diqqətə çatdırıblar. Daha sonra tədbir bədii hissə ilə davam edib.
TÜRKSOY-un təşkil etdiyi qala konsertdə Respublika və Beynəlxalq Müsabiqələr qalibləri "Vətən" Muğam Qrupunun üzvləri xanəndələr Səfalı Mirzəliyev, Nisbət Sədrayeva, tarzən Ruslan Zərbaliyev və kamança ifaçısı Pərviz Fərhadovun şıxışları böyük rəğbətlə qarşılanıb. Tədbirin sonunda musiqiçilərimiz gözəl çıxışlarına görə TÜRKSOY-un Baş katibi Sultan Raev tərəfindən döplomlarla təltif olunublar.
Qeyd edək ki, musiqiçilərimiz TÜRKSOY-un Azərbaycan üzrə təmsilçiləri, Azərbaycan Milli Konservatoriyasının və Azərbaycan Dövlət Mədəniyyət və İncəsənət Universitetinin müəllimləridirlər.