Bakıda Naxçıvan Muxtar Respublikasının (MR) 100 illiyinə həsr olunan "Naxçıvan-100” xalçasının təqdimat mərasimi baş tutub.
Mərasimdə rəsmi şəxslər və "Naxçıvan-100" xalçasının müəllifləri, ictimaiyyət nümayəndələri iştirak ediblər.
Tədbirdə çıxış edən Naxçıvan MR-də Azərbaycan Respublikası Prezidentinin səlahiyyətli nümayəndəsinin müavini Samir Seyidəhmədli Naxçıvanda xüsusilə son dövrlərdə ciddi inkişaf müşahidə olunduğunu deyib:
"Hazırda Naxçıvanın əldə etdiyi nailiyyətlərdə Prezident İlham Əliyevin uzaqgörən siyasəti mühüm rol oynayır. Bu gün Naxçıvanın 100 illiyini qeyd etməklə yanaşı, həm də onun zəngin mədəniyyətini və tarixini gələcəyə daşımağı vəd edirik".
Mədəniyyət nazirinin müavini Səadət Yusifova çıxışında Naxçıvanın çox qədim tarixə malik olduğunu xatırladıb:
"Naxçıvanda orta əsrlərdə tikilən abidələr onun qədim tarixindən xəbər verir. Bu gün təqdimatı keçirilən "Naxçıvan-100" xalçasının gələcək nəsillərə ötürülməsi və nümunə olması üçün əlimizdən gələni edəcəyik".
"Naxçıvan-100" xalçasının toxucusu Rübabə Əliyeva bu sənət nümunəsinin 80 gün ərzində ərsəyə gətirildiyini qeyd edib:
"Xalçaya ümumilikdə 497 min 250 ilmə vurulub. Eninin ilmə sayı isə 585-dir. Bu xalçanın Naxçıvanın 100 illiyi münasibətilə toxunulması onu digərlərindən fərqləndirir".
Milli Elmlər Akademiyasının (AMEA) prezidenti, akademik İsa Həbibbəyli "Naxçıvan-100" xalçasının doğum günü münasibətilə Prezident İlham Əliyevə bağışlandığını bildirib: "İlham Əliyevin doğum gününə hədiyyə olan xalçanı Xalça Muzeyinə bağışlayırıq".
Xalçanın hazırlanma prosesi ilə bağlı videoçarxın nümayişindən sonra ənənəyə uyğun olaraq xalçanın kəsimi baş tutub.
Daha sonra Naxçıvan Dövlət Filarmoniyası kollektivinin ifasında konsert proqramı təqdim olunub.
Tədbir Naxçıvan MR muzey fondlarına aid maddi mədəniyyət nümunələrindən ibarət sərgiyə baxışla davam edib.