Cəfər Cabbarlı adına Azərbaycan Dövlət Teatr Muzeyində Azərbaycan Dövlət Pantomima Teatrının yaradıcısı, Xalq artisti Bəxtiyar Xanızadənin anadan olmasının 65 illiyi münasibətilə tədbir keçirilib.
Tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq, Xalq artistinin yaradıcılığı haqqında məlumat verib.
Mədəniyyət Nazirliyinin İncəsənət və qeyri – maddi mədəni irs şöbəsinin müdiri Fərəh Acalova sənətkarı təbrik edib, ona yeni yaradıcılıq axtarışları arzulayıb.
Ardınca muzeyin elmi katibi Aytən Məmmədova aktyorun sənət fəaliyyətindən geniş söhbət açaraq sözü tədbir iştirakçılarına verib.
Tədbirdə iştirak edən qonaqlardan Xalq artistləri, kinorejissor Oqtay Mirqasımov, televiziya rejissoru Ramiz Həsənoğlu, aktyor Nurəddin Mehdixanlı, Məmmədsəfa Qasımov, Əməkdar İncəsənət xadimləri, teatrşünas, Aydın Talıbzadə , yazıçı İlqar Fəhmi və digər incəsənət xadimləri yubilyarı ad günü münasibətilə təbrik edərək və onunla bağlı öz ürək sözlərini bölüşüblər.
Tədbir çərçivəsində yubilyarın həyat və yaradıcılığını əks etdirən fotoşəkillərdən ibarət videoçarx nümayiş olunub, quruluş verdiyi tamaşalardan və oynadığı filmlərdən fraqmentlər göstərilib.
Eləcə də Azərbaycan Dövlət Akademik Opera və Balet Teatrının solistləri Əməkdar artist Səbuhi İbayev , Aytən Məhərrəmova , Mahir Tağızadə öz musiqi nömrələri ilə tədbirə bayram ovqatı qatıblar.