Bakı Ekspo Mərkəzində VIII Beynəlxalq Kitab Sərgisi çərçivəsində oktyabrın 7-də Yunus Əmrə İnstitutu Bakı Türk Mədəniyyət Mərkəzinin stendində Türkiyənin ölkəmizdəki səfiri Cahit Bağçının “Yokuşun çocukları” kitabının yeni nəşrinin təqdimatı və imza saatı təşkil olunub.
Beynəlxalq kitab sərgisinin önəmindən danışan səfir Cahit Bağçı bu gün yenidən burada olmasından və kitabının imza saatının keçirilməsindən məmnunluğunu bildirib: “Belə gözəl anları bizə yaşatdıqları üçün Azərbaycan Respublikası Mədəniyyət Nazirliyinə çox təşəkkür edirəm. Həqiqətən kitabı yaşatmaq əsas meyarlardandır. Azərbaycan kitaba verilən dəyər məsələsində ən öndə olan ölkələrdəndir. Əvvəlki sərgidə kitabımın ilk nəşrinin burada stendə imza saatını keçirmişdik, bu gün də növbəti nəşrin imza saatına toplanmışıq. Biz bu layihələrin davamlı olmasını arzulayırıq. Kitabı yaşatmaq çox önəmlidir. Kitab insanın ən yaxın dostudur. Əslində, kitabı rəqəmsal da oxumaq mümkündür, amma kitaba toxunmaq daha önəmlidir. Burada təqdim olunan “Yokuşun çocukları” kitabım bir dönəmin sosial tarixindən bəhs edir. Yəni, əsərdə Türkiyənin 1970-80-ci illərdəki həyatından, keçdiyi çətinlikdən danışılır. Bu kitab, eyni zamanda, sosial tarix və bioqrafik səciyyə daşıyır”, - deyə səfir qeyd edib.
Daha sonra səfir Cahit Bağçı "Yokuşun çocukları" kitabını imzalayaraq iştirakçılara hədiyyə edib.