Bu gün görkəmli alim, yazıçı, pedaqoq, XX əsr Azərbaycan elminin, ədəbiyyatının, təhsilinin inkişafında misilsiz xidmətlər göstərmiş Mir Cəlal Paşayevin anadan olmasının 114-cü ildönümüdür. Bu münasibətlə Respublika Gənclər Kitabxanası “Mir Cəlal Paşayev-yaddaşlarda gözəl xatırlanan şəxsiyyət” adlı videomaterialı onlayn rejimdə istifadəçilərə təqdim edib.
Hazırlanan materialda Mir Cəlalın pedaqoji və alimlik fəaliyyətinə xüsusi önəm verilib, burada yüzlərlə tələbənin sevimli müəllimi olan ədib haqqında xatirələri yer alıb. Videoçarxda bir sıra alim, dövrün ədəbiyyat nümayəndələri tərəfindən Mir Cəlal Paşayevin elmi fəaliyyətində xüsusi yer tutan “Füzulinin poetik xüsusiyyətləri” və “Füzuli sənətkarlığı” fundamental əsərləri haqqında söylənilən fikirlər də verilib. Bundan əlavə, videoçarxda ədibin “Dirilən adam", "Bir gəncin manifesti", "Açıq kitab" romanları haqqında da məlumatlar bölüşülüb. Hazırlanan material kitabxananın rəsmi saytında və sosial şəbəkələrində yerləşdirilib.
Bundan əlavə kitabxana daxilində “Yazıçı Mir Cəlal Paşayev” adlı ənənəvi kitab sərgisi də təşkil olunub. Sərgidə ədibin həyat və yaradıcılığını əks etdirən kitablar, dövrü mətbuat nümunələri, kitabxana əməkdaşları tərəfindən hazırlanan “Mir Cəlal həqiqətləri” tövsiyə - ədəbiyyat siyahısı sərgilənməkdədir.