Fevralın 23-də Rəşid Behbudov adına Mahnı Teatrında Xalq artisti Yalçın Rzazadənin xatirəsinə həsr olunmuş anım konserti keçirilib.

Konsertdən əvvəl çıxış edən Mədəniyyət Nazirliyinin İncəsənət və qeyri-maddi mədəni irs şöbəsinin müdiri Fərəh Acalova sənətkarın həyat yoluna nəzər salıb.

Bildirib ki, Yalçın Rzazadə aramızda olmasa da, onun musiqisi tamaşaçıların qəlbində yaşayır: “Əsl sənətkarın qoyduğu iz qəlblərdə daima qalır. Yalçın Rzazadə də belə sənətkarlardan idi. Onun özünəməxsus ifa tərzi həqiqi sənətkar olduğunun göstəricisidir. Yalçın Rzazadə bir çox görkəmli bəstəkarlarımızın mahnılarının ilk və mahir ifaçısı olub. Cahangir Cahangirov, Emin Sabitoğlu, Tofiq Quliyev, Oqtay Kazımi, Eldar Mansurov kimi bəstəkarlar onun üçün illər ərzində mahnılar bəstələyib. Kino xəzinəmizdən “Qayınana”, “Dədə Qorqud”, “Baladadaşın ilk məhəbbəti”, “Gün keçdi” kimi filmlərə Yalçın Rzazadə öz ifası ilə ölməzlik bəxş edib”.

Yalçın Rzazadənin Azərbaycan musiqi sənətinin ən parlaq nümayəndələrindən biri olduğunu deyən Fərəh Acalova bildirib ki, Mədəniyyət Nazirliyi olaraq mahir sənətkarın əziz xatirəsini dərin hörmət və ehtiramla anırıq.

Jurnalistlərə müsahibə verən Əməkdar artist Nüşabə Ələsgərli Yalçın Rzazadə ilə birgə çalışdığını söyləyib: “Yalçın Rzazadə ilə bizim tanışlığımız ötən əsrin 90-cı illərinə təsadüf edir. Biz bir yerdə konsert proqramlarında çıxış etmişdik. O qədər kübar, mədəni, ətrafındakılara sevgi ilə yanaşan bir insan idi ki… Tale elə gətirdi ki, Mədəniyyət və İncəsənət Universitetinə daxil olanda o bizim kafedranın müdiri olmuşdu. Biz bir yerdə 10 il çalışdıq. İşinə məsuliyyətli, tələbələrə qarşı tələbkar bir insan kimi yadımda qalıb. O, tənqidi və tərifi, ürək sözlərini də özünəməxsus bir şəkildə bildirirdi. Geyimindən tutmuş repertuar seçiminə qədər ondan kübarlıq yağırdı. Onunla bir səhnəni bölüşdüyüm üçün özümü şanslı hiss edirəm”.

Gecədə piano musiqisi sədaları altında görkəmli sənətkarın fotolarından ibarət slayd göstərilib.

Musiqili gecə Emin Sabitoğlunun “Bakı, sabahın xeyir” mahnısı ilə başlayıb. Konsert proqramı “Taleyim mənim”, “Gəl barışaq”, “Durnalar”, “Şirin dil”, “Ay Laçın”, “Dədə Qorqud” və sənətkarın digər mahnıları ilə davam edib.

Mahnıları teatrın solistləri Rövşən Qəhrəmanov, Fəxri Kazım-Nicat və Aynur İsgəndərli, Mətin Rzazadə, Xalq artistləri Heydər Anatollu, Gülyaz və Gülyanaq Məmmədova bacıları və Əməkdar artist Aygün Qurbanova ifa edib. Pianoda onları Xalq artisti Salman Qəmbərov müşayiət edib.

Çıxışlar tamaşaçılar tərəfindən alqışlarla qarşılanıb.