Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə mərkəzin könüllüləri tərəfindən dünyaşöhrətli bəstəkar, SSRİ-nin və Azərbaycanın Xalq artisti, Sosialist Əməyi Qəhrəmanı, Dövlət mükafatları laureatı Fikrət Əmirov haqqında özbək dilində bölmə yaradılıb.
Bölmədə Fikrət Əmirovun həyatı, yaradıcılığı, əsərləri, operaları, baletləri, simfonik muğamları, vokal əsərləri, musiqili komediyaları, teatr tamaşaları və kinofilmlərə yazdığı musiqilər haqqında məlumatlar öz əksini tapıb.
Qeyd olunur ki, Azərbaycanın qədim və zəngin mədəniyyətə malik Gəncə şəhərində anadan olan Fikrət Əmirovun bəstəkar kimi formalaşmasında o dövrün sənətkarlarının, yaşadığı mühitin mühüm təsiri olub. Fikrət Əmirovun bəstəkarlıq sənətinə yiyələnməsinin təşəbbüskarı müasir Azərbaycan musiqi mədəniyyətinin qurucusu Üzeyir Hacıbəylinin olduğu qeyd edilir.
Vurğulanır ki, Fikrət Əmirovun ən uğurlu əsərlərindən biri onun simli orkestr üçün yazdığı "Nizami" simfoniyasıdır. Bu simfoniya dünyanın ən məşhur dirijorlarının rəhbərliyi ilə ifa olunub.
Bildirilir ki, Azərbaycan Dövlət Mahnı və Rəqs Ansamblı, Gəncə Dövlət Filarmoniyası, Bakı, Gəncə və Sumqayıt şəhərlərində fəaliyyət göstərən bir sıra musiqi məktəbləri görkəmli musiqi xadimi Fikrət Əmirovun adını daşıyır.
Deyilir ki, "Azərbaycanfilm" kinostudiyasında "Fikrət Əmirov" qısametrajlı sənədli filmi ekranlaşdırılıb, 2011-ci ilin sentyabrın 19-da Bakıda Fikrət Əmirovun xatirəsinə ucaldılmış abidənin açılışı olub.