Sabirabadda 1 əsrdən çox yaşı olan tarixi hamam baxımsızlıqdan tarixə qovuşmaq üzrədir. Dövrünün mühüm hadisələrinə şahidlik etmiş bu hamamın hazırkı vəziyyətinin səbəbi nədir?
İlk baxışdan xarabalığı xatırlatsa da, bir vaxtlar bura Sabirabad şəhərinin əhalisinin həyatında böyük əhəmiyyətə malik hamam olub. 1900-cü ildə Seyyid Mirmusa Tağıyev tərəfindən inşa edilən tikili indi el arasında Köhnə hamam kimi də tanınır. Sabirabad sakini Ağa Tağıyev deyir ki, babasından qalan bu memarlıq nümunəsi 100 ildən artıq əhaliyə xidmət edib.
Tikildiyi gündən isə hamamda heç bir təmir işi görülməyib. Buradan kişilərlə yanaşı, qadınlar da istifadə edib. Hamamda kişilər üçün ayrı, qadınlar üçün isə ayrı bölmə fəaliyyət göstərib.
İnsanlar tərəfindən bir zamanlar təmizlik yeri kimi istifadə olunan bu hamamın indi özünün həm təmizliyə, həm də əsaslı təmirə ehtiyacı var. Yoxsa, gün keçdikcə bu hamamın tarixə qovuşmaq ehtimalı daha da artır.
Halbuki hamama tarixi görünüşünü, vəziyyətini qaytarmaqla bura turist cəlb etmək də mümkündür.
Mədəni İrsin Qorunması, İnkişafı və Bərpası üzrə Dövlət Xidmətindən bildirildi ki, tarixi tikilinin aqibəti ilə bağlı məlumatlıdırlar. Və yaxın gələcəkdə tədbir görüləcək.
Qeyd edək ki, hamam 2001-ci ildə yerli əhəmiyyətli abidə kimi qeydiyyata alınaraq Sabirabad rayonu üzrə 17 belə tarixi abidədən biri olub. Bu qismən də olsa mədəniyyət nümunəsinin gələcək taleyinin müsbət olacağına ümid yaradır.