Nizami Kino Mərkəzində Heydər Əliyev Fondunun dəstəyi ilə çəkilən "Ekranın səsi" sənədli filminin təqdimat mərasimi olub. Film Xalq artisti, Azərbaycan Televiziyasında diktorluq məktəbinin ən parlaq nümayəndələrindən olmuş Rafiq Hüseynlinin həyat və yaradıcılığına həsr edilib.
“Ekranın səsi”... Xalq artisti, Azərbaycan Televiziyasında diktorluq məktəbinin yaradıcısı Rafiq Hüseynli haqqında Heydər Əliyev Fondu tərəfindən çəkilmiş filmin adı belə də adlanmalı idi. Çünki görkəmli sənətkar təkrarsız səsi, yüksək mədəniyyəti, istedadı ilə təkcə dövrünün deyil, günü bu gün də efirdə yayımlanan xronikadan belə ekranları bəzəyir.
Nizami Kino Mərkəzində keçirilən təqdimat mərasimində Rafiq Hüseynli ilə bağlı zəngin xatirələri olan doğmaları, dostları, tələbələri iştirak edirdi. Ekran əsərinin ideya müəllifi mərhum sənətkarın qızı Leyli Hüseynli, ssenari müəllifi və rejissoru həyat yoldaşı Səbinə Hüseynlidir. Film Rafiq Hüseynlinin vaxtilə aparıcısı olduğu verilişlərdən, səsləndirdiyi filmlərdən, müxtəlif televiziya proqramlarında verdiyi mühahibələr əsasında hazırlanıb.
“Ekranın səsi” filmində Rafiq Hüseynlinin dostları, vaxtilə Azərbaycan Televiziyasında çiyin-çiyinə çalışdığı həmkarları onun işıqlı həyat yolundan ürəkdolusu danışıblar.
Azərbaycan Televiziyasında diktorluq məktəbinin yaradıcısı olmuş Rafiq Hüseynli hazırda bu sahədə öz sözünü deyən neçə-neçə peşəkar aparıcı nəslinin yetişməsində əvəzsiz əməyi var. Filmdə görkəmli sənətkarın tələbələri onunla bağlı xatirələrini bölüşüblər.
Ülviyyə Heydərova, Zaur Bayramov