2022-ci ilin ən gözlənilən filmlərinin siyahısı açıqlanıb. “Betmen”, “Avatar 2”, “Morbius”, “Kralın adamı” də daxil olmaqla onlarla ekran əsərinin bu il tamaşaçılara təqdim edilməsi planlaşdırılır.
Pandemiya davam edir. Studiyalar filmlərin premyeralarını davamlı olaraq təxirə salsa da bəzi ekran əsərlərinin geniş ekranlara çıxması gözlənilir. Rejissor Mettyu Vonun quruluş verdiyi “Kralın adamı” filmi yanvarın 13-də tamaşaçılara təqdim olunacaq. Filmdə Harris Dikinson, Daniel Bryül, Reyf Fayns, Ris İvans və başqaları çəkiliblər.
“Sony” kino şirkəti tərəfindən istehsal olunan “Morbius” filminin rejissoru Daniel Espinosadır. Ekran əsəri eyniadlı Marvel komiks personajına əsaslanır. Filmin süjet xətti nadir qan xəstəliyindən özünü müalicə etməyə çalışdıqdan sonra vampirə çevrilən baş personajın ətrafında cərəyan edir. “Morbius” filmində Jared Leto, Mett Smit, Adria Arxona, Tayris Qibson və başqaları çəkiliblər.
Yeni il yeni Betmenlə gəlir. Bu dəfə Mett Rivzin rejissorluğu ilə. Robert Pattinsonun baş rolu ifa etdiyi “Betmen” Qotemdə məmurlara qarşı cinayətlər törədən Riddler kimi tanınan qatilin arxasınca düşür. Filmdə Zoi Kraviç, Pol Dano, Kolin Farrell və başqaları çəkiliblər.
Rejissor Ceyms Kameronun “Avatar 2” filmi Navi xalqının taleyi haqqında hekayənin davamıdır. Film avatar Ceyk Salli və həyat yoldaşı Neytirinin sevgisindən bəhs edir. Ekran əsərində hadisələr Pandorada baş verir. Həmçinin Omatikaya meşə klanı ilə yanaşı, dəniz rifində yaşayan Metkayin klanı da süjetdə mühüm rol oynayır. 2009-cu ildə ekranlara çıxan “Avatar” filmiylə dünya şöhrəti qazanan aktyorlar Cem Uortinqton, Zoi Saldana, Siqurni Uiver, Coel Devid Mur bu dəfə də baş rolları canlandırıblar.
Ülviyyə Heydərova