Dekabrın 14-də Gürcüstanın paytaxtı Tbilisidə dünyaşöhrətli sənətkar, Azərbaycan və SSRİ-nin Xalq artisti Rəşid Behbudovun anadan olmasının 106-cı ildönümünə həsr olunmuş xatirə konserti təşkil olunub.
Tədbir Mirzə Fətəli Axundzadə adına Azərbaycan Mədəniyyəti Mərkəzinin təşkilatçılığı ilə Tbilisi Dövlət Konservatoriyasında reallaşıb.
Xatirə konsertinin keçirilməsinə Gürcüstanın Mədəniyyət, İdman və Gənclər Nazirliyi, Azərbaycanın Gürcüstandakı səfirliyi, SOCAR şirkəti dəstək göstəriblər.
Tədbirə gələnlər konservatoriyanın foyesində unudulmaz sənətkarın həyat və yaradıcılığını əks etdirən fotosərgi ilə tanış olublar.
Konsert “Melita” rəqs qrupunun ifasında “Arşın mal alan” rəqsi ilə başlayıb.
Tanınmış gürcü mədəniyyət xadimləri Gelodi Potsxişvili, Vaxtanq Qaçeçiladze dünyaşöhrətli sənətkar Rəşid Behbudov haqqında xatirələrini bölüşüb, yaradıcılığından söz açıblar.
Sonra konsertdə gürcü və azərbaycanlı solistlər – Zümrüd Əlizadə, Ərtoğrul Balayev, Natəvan Həsənova, Nərgiz Əliyeva, Hüseyn Əliyev, Tedo Qoridze, Surə Rüfət, Teymur Kazımov, Dilarə Kərimova, İamze Urumaşvili Sənsiz, “Natəvana ithaf”, “Sevgilim”, “Bakı nəğməsi”, “Ey Vətən” mahnılarını ifa ediblər.
Azərbaycan Mədəniyyət Nazirliyinin dəstəyi ilə Azərbaycan Dövlət Akademik Filarmoniyasının “Gənclərə dəstək” layihəsinin gənc musiqiçiləri də konsertdə çıxış ediblər.
Sonda Həzrət Əzizli Nərgiz Əliyevanın müşayiəti ilə “Yaşa Azərbaycan” mahnısını ifa edib.