Beynəlxalq Muğam Mərkəzi (BMM) ilə Özbək Makom (muğam) Milli İncəsənət Mərkəzi arasında onlayn görüş keçirilib.
Onlayn görüşdə Beynəlxalq Muğam Mərkəzinin direktoru, Xalq artisti Murad Hüseynov BMM-in konsert, beynəlxalq, nəzəri və elmi-tədqiqat fəaliyyəti haqqında məlumat verib.
Özbəkistanın Muğam Milli İncəsənət Mərkəzinin direktoru Saibcan Beqmatov öz növbəsində birgə mədəniyyət layihələrinin, konsertlərin keçirilməsini təklif edib.
Görüş zamanı iki təşkilat arasında qarşılıqlı mədəniyyət mövsümlərinin keçirilməsi və bir sıra məsələlər müzakirə edilib. Müzakirələr zamanı milli musiqinin təbliği baxımından iki qurum arasında qarşılıqlı əməkdaşlıq imkanları nəzərdən keçirilib.
Azərbaycanın muğam və Özbəkistanın makom sənətinin qarşılıqlı öyrənilməsi və tədqiqi istiqamətində fikir mübadiləsi aparılıb. Bu sahənin tədqiqatçıları arasında təcrübə mübadiləsi aparılması ilə bağlı razılıq əldə olunub. Eyni zamanda, xanəndələrlə makom sənətinin müəllimləri arasında əməkdaşlığın qurulması məsələsi müzakirə olunub.