Keçən ilin sentyabr ayının 27-dən başlayaraq 44 gün davam edən noyabrın 8-də əbədi və əzəli torpaqlarımız ilə yanaşı füsünkar təbiəti olan Şuşanın alınması ilə nəticələnən Vətən müharibəsi xalqımızın iftixar və qürur mənbəyinə çevrilib. Azərbaycan xalqı öz liderinin - Müzəffər Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi. Bu Qələbə siyasi arenada öz sözünü demiş bir liderin müdrik siyasəti, bütöv bir xalqın birliyi və neçə-neçə qəhrəman Azərbaycan əsgərinin şücaəti əsasında qazanılıb.
Gənclərin hərbi-vətənpərvərlik tərbiyəsində iştirak edən, müasir gəncliyimizin maarifləndirilməsində əvəzsiz xidmətləri olan Respublika Gənclər Kitabxanası Azərbaycan tarixinin şanlı səhifəsi olan Zəfər Günü ilə əlaqədar olaraq çoxlu sayda materiallar hazırlayıb və onları sosial şəbəkələr vasitəsilə öz izləyicilərinə təqdim edib.
Kitabxananın müəllifi olduğu “Bizi zəfərə aparan qəhrəmanlar” layihəsi çərçivəsində Vətən müharibəsinin əllidən çox iştirakçısı haqqında videomateriallar hazırlanıb. İzləyicilər burada Vətən müharibəsi qəhrəmanları Elşən Abdullayev, Fizuli Əliyev, Elşad Allahverdiyev, Elgün Muradov, Ruslan Cəfərli, Xudayar Yusifzadə, Fərid Əliyev, Teymur Abbasov, Xalid Nəciyev və bu kimi qəhrəman Azərbaycan oğulları, onların həyatı, qəhrəmanlıq yolu, döyüş tarixi haqqında məlumat ala, şəxsi və döyüş fotoalbomlarından şəkillər ilə tanış ola bilərlər.
Kitabxana “Zəfər Günü” münasibətilə üç dildə “Gənclər Vətənin keşiyində” virtual kitab sərgisi hazırlayaraq izləyicilərə təqdim edib. Burada Azərbaycan, rus və ingilis dillərində Azərbaycan hərb tarixinə, qəhrəman Azərbaycan oğullarına həsr olunmuş kitablar sərgilənib, onların annotasiyaları verilib. Həmçinin kitabxananın əməkdaşları Azərbaycanın Milli Qəhrəmanı Polad Həşimov haqqında da ingilis dilində material hazırlayaraq izləyicilərə təqdim edib.
Ümumilikdə Respublika Gənclər Kitabxanasının Vətən müharibəsi və onun iştirakçıları haqqında hazırladığı materiallar, virtual kitab sərgiləri, videoçarxların sayı 100-dən çoxdur. Bu materialların hər birində qəhrəman Azərbaycan xalqının iradəsi, uzun illər qəlbində yaşatdığı Vətən həsrəti və bu həsrətin sonunda qazandığı Qələbə sevinci öz əksini tapır.