Dünyada pop-mədəniyyətin tanınmış simalarından birinə çevrilmiş Bob Dilanın bu gün 80 yaşı tamam olur. O, 60 illik səhnə karyerası boyu onlarla müxtəlif obraz qazanıb. Bu obrazların hər biri o qədər səs-küy yaradıb ki, onlara geniş araşdırmalar həsr edilib, hətta kitablar yazılıb. Növbəti süjetdə musiqi və ədəbiyyat dünyasını öz adı ilə silkələyən sənətkarın yaradıcılıq yoluna nəzər salacağıq...
"Amerika musiqisinin ənənələri çərçivəsində yeni poetik ifadə yaradan" Bob Dilan mədəniyyət dünyasında inqilabçı sənətkar kimi tanınır. Bu təxəllüsü isə ona “Blowing in the Wind” mahnısı qazandırıb. 60-cı illərdə bəstələdiyi bir çox musiqi nümunələri də dövrün anti-müharibə hərəkatının himninə çevrilib. Gənc yaşlarından şöhrət qazanan müğənni öz istedadını folk, cazz, bluz, kantri janrlarında da sınayıb. Dövrünün məşhur musiqiçiləri ilə eyni səhnəni bölüşən Bob Dilan haqqında “Rolling Stone” jurnalı yazırdı: “Onun musiqisi streotipləri darmadağın edərək bütün dövrlər üçün müasir sayılır”. 1994-cü ildən başlayaraq, çəkdiyi rəsmlərdən ibarət kataloqlarını nəşr edən sənətkar müxtəlif dövrlərdə nüfuzlu mükafatların da sahibi olub. 2008-ci ildə isə Pulitzer Mukafatı təşkilatı Bob Dilanı “Amerika mədəniyyətinə və populyar musiqiyə verdiyi töhfələrə görə” mükafatlandırıb. 2016-cı ildə Ədəbiyyat üzrə Nobel Mükafatına da layiq görülüb. “Heç vaxt bitməyən turları” ilə dünyanı gəzən Bob Dilan 2020-ci ilə Yaponiyada 14 konsert ilə çıxış etməyi nəzərdə tuturdu, lakin COVID-19 pandemiyası ilə əlaqədar bu səfər təxirə salındı. Sənətkarın tezliklə yeni qasrtolları ilə dünyadakı pərəstişkarlarını sevindirməsi ümidi ilə...
Xavər Zairova