Azərbaycanın görkəmli teatr və kino aktyoru, lirik-psixoloji üslublu aktyorluq məktəbinin qabaqcıl sənətkarlarından biri, fəlsəfi-dramatik və faciə rollarının mahir ifaçısı Fuad Poladov yaşasaydı, 73 yaşını qeyd edəcəkdi…
Aktyorun özünəməxsus ifa tərzi onun yaratdığı bir-birindən fərqli obrazlarda müxtəlif cür təcəssüm olunur. Çəkildiyi filmlər və televiziya tamaşalarında, əsasən, mənfi obrazlar ustası kimi yadda qalsa da, Azərbaycan teatrının səhnəsində saysız-hesabsız obrazlar canlandırıb. Sənətə 1966-cı ildə “İstintaq davam edir” filmində çəkildiyi Səlim rolu ilə gələn Fuad Poladov müəllimi Tofiq Kazımovun dəvəti ilə tələbə ikən Akademik Milli Dram Teatrında İlyas Əfəndiyevin "Məhv olmuş gündəliklər" pyesinin tamaşasında Savalan rolunu oynayıb. O, “Ad günü”, “Ailə”, “Arxada qalmış gələcək”, “Beşmərtəbəli evin altıncı mərtəbəsi”, “Əlvida, cənub şəhəri”, “Fatehlərin divanı”, “İşarəni dənizdən gözləyin”, “Dolu” və digər filmlərdə yaddaqalan obrazları ilə tamaşaçıların sevimlisinə çevrilib. Akademik Milli Dram Teatrı və Səməd Vurğun adına Azərbaycan Dövlət Rus Dram Teatrınında onlarla obraza səhnə həyatı qazandırıb. Canlandırdığı xarakterlərin psixoloji və emosional duyğularını yeni biçimdə və orijinal şəkildə tamaşaçılara təqdim edib. O, səhnədə düşünməyi, düşüncələrini fəlsəfi dəyərlərlə çatdırmağı, ən adi obraza da psixoloji ahəng verməyi bacaran sənətkar olub. Poladov səsinin ahəngi oynadığı rolun xarakterinə görə dəyişə, ifa etdiyi şeirə əlvanlıq gətirə bilirdi.
Ədiqə Mustafayeva