Dünyaca məşhur amerikalı kino-rejissor Spike Lee 2021 Cannes Film Festivalı üçün münsiflər heyətinin sədri təyin edilib. Təşkilatçıların yeni sədrin peşəkar fəaliyətinə ümidləri böyükdür. Mövcud pandemiya səbəbilə ötən ilki buraxılışı təxirə salınan festivalın bu ilki tədbiri də öz vaxtından 2 ay gec keçiriləcək.
63 yaşlı rejissor 1980-ci illərin sonunda ərsəyə gələn “She's Gotta Have It” və "Do the Right Thing" filmləri ilə tanınıb. 2018-ci ildə isə “Blackklansman” filmilə Cannes Grand Prix mükafatına layiq görülüb. Cannes film festivalı dünya kinomotoqrafiya sənayesinin ən böyük mükafat platformalarından biridir. Münsiflərin sədri artıq müəyyən edilsə də, heyətin digər üzvləri və filmlərin proqramı iyunun əvvəlində açıqlanacaq. Bütün dünyada tüğyan edən COVİD-19 bəlasının fəsadları film sənayesindən də yan keçmir. Məlum pandemiya səbəbindən ötən il Cannes film festivalı ənənəvi may buraxılışını əvvəlcə, iyuna keçirib, daha sonra isə ləğv etməyə məcbur olub. Beynəlxalq festivalın rəhbəri Pierre Lescure deyib ki, Cannes Film Festivalının təşkili bu il də may ayına yox, 6-17 iyul tarixlərinə planlaşdırılır. 74-cü Palma d'Or mükafatı da iyulun 17-ə təyin edilib. O, yeni təyin edilmiş sədr haqqında da müsbət fikirlər səsləndirib. Qeyd edib ki, Spike Lee zəhmətkeş bir peşəkardır, dövrünün uğurlu film mütəxəsisslərindən biridir və kino sənayesində mövcud problemlərin həlli yollarında bizə yardımçı olacaq.
Amal Alışarlı