Cəfər Cabbarlı adına Azərbaycan Dövlət Teatr Muzeyində Milli Teatr Günü münasibətilə tədbir keçirilib.
Tədbirdə Xalq artisti Fuad Poladovun “Bütün deyilənlərə rəğmən və ya Ağa Məhəmməd şah Qacar” tamaşasında Xalq rəssamı Arif Hüseynovun qrafika janrında çəkdiyi “Qacar” obrazının portreti rəssam tərəfindən muzeyə təqdim olunub.
Tədbir çərçivəsində hər iki sənətkarın yaradıcılığı barədə, eləcə də tamaşası ətrafında müzakirələr aparılıb. Həmçinin Fuad Poladovun muzeyin fondunda saxlanılan fotolarından ibarət videoçarx nümayiş olunub, oynadığı tamaşalardan və çəkildiyi filmlərdən fraqmentlər izlənilib.
Tədbirdə Xalq rəssamı Arif Hüseynov, Əməkdar incəsənət xadimləri – sənətşünas Ziyadxan Əliyev, dramaturq Əli Əmirli, teatrşünas Aydın Talıbzadə, aktyorun ailə üzvləri və media nümayəndələri iştirak ediblər.
Tədbir COVID-19 pandemiyası ilə əlaqədar məhdud sayda auditoriya ilə təşkil olunub və həmçinin sanitar-gigiyenik qaydalara əməl edilib.
Fotolar Rüstəm İsmayılovundur