2020-ci il mədəniyyətimizin yaddaşına necə həkk olundu? Azərbaycan həmişə olduğu kimi «Yeni ili gələn il bu vaxtı Qarabağda, Şuşada keçirək» deyib, 2020-ci ilə böyük ümidlərlə daxil oldu. Baxmayaraq ki, ölkədən çox-çox uzaqda olan Çin yeni növ koronavirusa görə narahatlıq içində idi. Virusun bu qədər sürətlə yayılacağını nəinki ölkəmizdə, heç okeanın o tayında belə gözləmirdilər. Hər yerdə olduğu kimi, ölkəmizdə də mədəniyyət öz işində idi, filmlər çəkilirdi, tamaşalar qoyulurdu.
Bu ilin əvvəlində YUĞ Teatrı yenidən «Mənəm, mən» deyib «Quş dili»ndə danışdı, Gənc Tamaşaçılar Teatrı «Dəli yığıncağını» göstərdi. Musiqili Teatr «Qızıl toy»a hazırlaşırdı, Akademik Milli Dram Teatrı isə tamaşaçılarını «Filumena Marturano» ilə tanış etmək istəyirdi...
Amma koronvirus pandemiyası, sərt karantinin qoyduğu qadağalar mədəniyyətimizdən də yan keçmədi. Teatrlar, muzeylər «Evdə qal» dedi. Film çəkilişləri dayandı, teatrlar, sərgilər onlayn nümayişlərlə əvəz olundu, konsertlər salonlardan deyil, evlərdən verilməyə başladı.
2020-ci il dövlət tərəfindən təmir olunan bəzi mədəniyyət ocaqlarının açılışı ilə də yadda qaldı. Prezident İlham Əliyev və birinci xanım Mehriban Əliyeva Gəncədə «Şah Abbas» və «Uğurlu xan» karvansara kompleksinin, Vaqif Mustafazadə adına 2 nömrəli Uşaq İncəsənət Məktəbinin bərpadan sonra istifadəyə verilməsi mərasimində iştirak etdilər, Balaxanı qəsəbəsində aparılan abadlıq işləri ilə tanış oldular. Ölkə başçısı Balakən şəhər Uşaq İncəsənət məktəbinin yeni binasının, Birinci vitse-prezident Mehriban Əliyeva Bülbülə qəsəbəsindəki Uşaq İnsəcənət Məktəbinin yeni binasının açılışında iştirak etdilər, yaradılan şəraitlə tanış oldular.
2020-ci il Azərbaycan kinosu üçün çox uğurlu oldu. Gənc rejissor Hilal Baydarovun «Səpələnmiş ölümlər arasında» tammetrajlı bədii filmi dünyanın ən nüfuzlu 77-ci Venesiya Film Festivalında «Qızıl Şir» mükafatı uğrunda yarışdı. Rejissor Rüfət Həsənovun «Daxildəki ada» filmi Sarayevo Film Festivalında qalib oldu, Teymur Hacıyevin «Axşama doğru» qısametrajlı filmi Kann Kino Festivalının 59-cu «Tənqid həftəsi»ndə yer aldı.
2020-ci il Azərbaycan mədəniyyətində «onlayn tamaşa», «virtual sərgi» sözləri daha çox işlənsə də tariximizin ən böyük zəfərinin canlı şahidi olduq. Ali Baş Komandan və şanlı Azərbaycan Ordusu Qarabağımızı 44 günə geri qaytardı. Müzəffər Ordumuz düşməni iti qovan kimi qovdu. Bu aylar ərzində «Qarabağ mədəniyyətimizin beşiyi» ifadəsi dillərdən düşmədi. Qarabağ, onun ürəyi Şuşa zəngin mədəniyyəti, yaralı tarixi ilə Azərbaycana qovuşdu.
2020-ci ilin son ayı isə mədəniyyətimiz üçün daha bir əlamətdar hadisə ilə yadda qaldı. Türkiyə, Azərbaycaq, İran və Özbəkistanın birgə hazırldığı «Miniatür sənəti», ölkəmizin təqdim etdiyi «Nar bayramı, ənənəvi nar festivalı və mədəniyyəti» UNESKO-nun Bəşəriyyətin qeyri-maddi mədəni irsi üzrə Reprezentativ Siyahılarına daxil edildi.
“Bu il mədəniyyət ocaqları daha çox evlərdən fəaliyyət göstərsə də 2021-ci ili qalib ölkə kimi böyük sevinclə qarşılayırıq. Bütün qələbələr isə mədəniyyəti, incəsənəti yalnız işığa aparır”.
Ülviyyə Heydərova