Şaqraq səsi ilə insanların qəlbini ovsunlayan, onlara muğamlarımızı, xalq mahnılarımızı sevdirən sənətkar - Tükəzban İsmayılova... Özünəməxsus üslubda oxuduğu muğam və mahnılarla milli musiqi xəzinəmizi zənginləşdirən Xalq artistinin anadan olmasından 97 il ötür.
Musiqi aləmində elə sənətkarlar var ki, onlar bu gün də mədəniyyətimizin, incəsənətimizin zirvəsi hesab olunurlar. Elə ömrünün 65 ilini muğama həsr edən Tükəzban İsmayılova kimi... O, yüksək ifaçılıq qabiliyyəti ilə nəhəng salonları ayağa qaldıraraq, sürəkli alqışlara qərq edir və səsi ilə hər kəsi sehrinə salırdı. Musiqimizin görkəmli nümayəndəsi olan Tükəzban İsmayılovanın ifa etdiyi muğamlar və xalq mahnıları zəngin musiqi tariximizin daim vərəqlənən səhifələrinə əbədi həkk olunub. Milli musiqimizin inkişafında böyük əməyi olan Tükəzban xanım peşəkar ifaçılığın bütün incəliklərini dərindən mənimsəyərək xanəndəlik sənətimizə misilsiz töhfələr verib. Onun özünəməxsus üslubda ifa etdiyi “Qatar”, “Xaric-segah”, “Şahnaz” muğamları Tükəzban İsmayılova yaradıcılığının şah damarıdır. Sənətkarın oxuduğu mahnı və təsniflər məhz onun təkrarsız ifasında daha çox sevilir. Bir çox mədəniyyət mərkəzlərinin solisti olan müğənninin repertuarında səslənən “Kürdün gözəli”, “Yeri, dam üstə yeri”, “Qara göz” və bu kimi xalq mahnıları dinləyiciərin qəlbini fəth edib. Tükəzban İsmayılova dünyanın bir çox ölkələrində Azərbaycan mədəniyyətini layiqincə təmsil edib. Gənc xanəndələr nəslinin yetişməsində də onun müstəsna xidmətləri var.