Nə qədər böyüsək də, yaşımızın üzərinə yaş gəlsə də maraqlı bir oyuncaq görən kimi üzümüzdə təbəssüm yaranır. Bəlkə də yeni il bayramını sevməyimizin bir səbəbi də budur. Çünki əlvan bəzəklər, yumşaq oyuncaqlar, sujetli fiqurlar bizi uşaqlığımıza aparır, xoş xatirələri canlandırır... Elə ukraynalı rəssam da bu məqsədlə bir-birindən gözəl oyuncaqlar hazırlayır.
Pamıq, məftillər və boyalarla əhatələnən Marina Geraşçenko evindəki emalatxanasında əsl bayram əhval-ruhiyyəsi yaradıb. Hazırladığı kiçik oyuncaqlarla uşaqlıq xatirələrini canlandıran ukraynalı rəssam hər bir əl işinə xüsusi ad da qoyur və onların üzərinə qoyduğu kiçik açıqcaya hazırlandığı tarixi və yeri qeyd edir.
Marina Geraşçenko deyir ki: "Əvvəlcə personajın hansı hərəkət formasında olacağını planlayıram. Məsələn, bunu xizəkdə oturan oğlan kimi hazırlayıram. Bir əlində xizəyin ipini, digərində isə qartopu tutacaq. Bədən forması verəndən sonra başlayıram geyimini düzəltməyə".
Marinaya görə pambıqdan düzəltdiyi personajların da ruhu var və hər biri milli xarakterik xüsusiyyətlərə malikdir. Geraşçenko sevgi ilə ərsəyə gətirdiyi balaca oğlan və qız fiqurlarına köhnə açıqcaların rəsmlərindən ilhamlanaraq dizayn verir.
"Oyuncaqlar xoşbəxtlik gətirir. Hazırki dövrdə ən çox buna ehtiyacımız var. Mehribanlığa, rifaha, xoş münasibətə... insanlar sanki qəddarlaşıblar... Ona görə də oyuncaqları hazırlayarkən mahnılar oxuyuram, xoş əhval-ruhiyyəmi, müsbət enerjimi əl işlərimə ötürürüəm" - deyir Marina Geraşçenko.
Marinanın əl işlərini, əsasən, şəxsi kolleksiyaçılar sifariş edir. Rəssamın miniatür oyuncaqları təkcə ölkəsində deyil, Rusiyada, Moldovada və Baltikyanı ölkələrdə də məşhurdur.