Dekabrın 20-də İstanbulda “Türkvision“ mahnı müsabiqəsi keçiriləcək. Pandemiya səbəbindən müsabiqə onlayn formatda tamaşaçılara təqdim ediləcək.

“Turkvision” Mahnı Müsabiqəsi Türk Dünyasının müasir musiqisinin dünyada tanıdılması və türkdilli xalqlar arasında mədəni əlaqələrin daha da möhkəmlənməsinə töhfədir. Bu il “Türk dünyasının qızıl səsi” adı uğrunda Türkiyə, Qazaxıstan, Azərbaycan, Qırğızıstan, Özbəkistan, Tatarıstan, Tuva, Başqırdıstan, Türkmənistan, Gürcüstan, Moldova, Ukrayna, Makedoniya, Bosniya və Herseqovinadan, Krımdan, digər ölkələrdən və regionlardan 24 müğənni mübarizə aparacaq. Koronavirus pandemiyası səbəbindən onlayn  keçiriləcək müsabiqədə ölkəmizi gənc ifaçı Aydan İlxaszadə təmsil edəcək. Qalib klip çəkmək və növbəti müsabiqədə fəxri qonaq qismində iştirak etmək hüququ qazanır. Müsabiqənin başlamazdan əvvəl sosial mediada ən çox səs toplayan mahnı üçün isə Auditoriya Mükafatı da olacaq. Vokalçıları beynəlxalq münsiflər heyəti qiymətləndiriləcək. Bu il Azərbaycan əsilli Belarusiyalı müğənni Günəş Abbasova münsiflər heyətinə rəhbərlik edəcək. Qeyd edək ki, türk xalqları mədəniyyətini özündə cəmləşdirən “Türkvision” mahnı müsabiqəsi ilk dəfə 2013-cü ildə Əskişəhərdə keçirilib. 2021-ci ildə isə müsabiqənin Azərbaycanın mədəniyyət beşiyi- Şuşada keçirilməsi nəzərdə tutulur.