Kim Ki Duk… Görkəmli Cənubi Koreya rejissoru. Çəkdiyi filmləri ilə dünya kinosuna yeni nəfəs gətirən rejissor da Covid - 19 pandemiyasının qurbanı oldu.
Amerikalı rejissor Conatan Demminin «Quzuların səssizliyi» filmi 32 yaşlı Kim Ki Dukun həyatında baxdığı ilk ekran əsəridir. Gələcək rejissor «Quzuların səssizliyi»ndən sonra kino dilində heç vaxt susa bilməzdi. Baxmayaraq ki, onun heç bir kino təhsili yox idi.
«Timsah» filmi ilə ilk dəfə kinoda addım atan sənətkar yazdığı ssenarilərə özünəməxsus tərzdə həyat verir. Kim Ki Duk qəhrəmanlarını gah «Quş yuvası» oteli»nə, gah «Ada»ya, gah da «Naməlum ünvana» göndərir.
«Yaz, yay, payız, qış və yenə də yaz», «Boş ev» filmləri Kim Ki Duk yaradıcılığını nüfuzlu kino mükafatlarla doldurur. O, Venesiya Kino Festivalının «Ən yaxşı rejissor»u da olur, Berlin Beynəlxalq Film Festivalının «Qızıl ayı» heykəlciyini də alır. Amma o, mükafatlar üçün yox, özünü ifadə etmək üçün çəkirdi.
«Kim Ki Duk «Vatikana» səfər edəndə Mikelancelonun «Pyeta» heykəlinə valeh olur, İsa üçün ağlayan Məryəm onu təsirləndirir. Kim Ki Duk söyləyirdi ki, onda ana obrazı, övladına münasibətini göstərmək ideyası yarandı və rejissor çox kaeçmədi ki, «Pyeta» filmini çəkdi».
Kim Ki Duk növbəti insan qəddarlığını «Pyeta» filmində göstərir. Rejissorun kino dili qəddar olduğuna görə o, zorakılıq səhnələrinə xəsislik etmir. Buna əsas səbəb isə rejissorun göstərmək istədiyi qəhrəmanlarının ölümün bir addımlığında olmasıdır.
Kim Ki Duk «Nəfəs» filmini çəkəndə bəlkə də düşünməzdi ki, nə vaxtsa özünün nəfəsi Covid-19-dan kəsiləcək. Rejisorun ömrü çəkdiyi ölməz filmlərin lentinə birləşdi.
Ülviyyə Heydərova