II Qarabağ Müharibəsi şəhidləri öz qəhrəmanlıqları ilə dastana çevrildilər. “Vətən yaxşıdır” ifadəsi ilə yola çıxan igidlər şeirə, hekayəyə, heykələ çevrildilər. Vətən müharibəsi şəhidləri gənc heykəltəraş Jalə Əliyevanın da yaradıcılığını büsbütün dəyişdirib.
O, bu sənətin incəliklərini Rəssamlıq Akademiyasında ustadı, Xalq rəssamı Ömər Eldarovdan öyrənir. Vətən Müharibəsi başlayanda istedadlı heykəltəraş öz sevincini, kədərini əlində mum olan gillə, daşla bölüşdü, Azərbaycanın ərazi bütövlüyü uğrunda canından keçən şəhidlərin qəhrəmanlığını qan yaddaşından, daş yaddaşa çevirdi.
«Müharibəbə bizim insanlarımızın vətənpərvərliyinə, oğullarımızın yüksək ruhla döyüşməklərinə, şəhid olmaqlarına, ölümə gülə-gülə getməklərinə çox təsirlənmişəm. Ona görə, mövzum tamamilə dəyişdi və şəhidlərimizin büstünü, hətta kompozisiya işləməyi qərarina gəldik» - deyir Jalə Əliyeva.
O, ilk hazırladığı büstü Vətən müharibəsində qəhrəmanlıq göstərən, 19 yaşında şəhidlik zirvəsinə ucalan Cəbrayıl Dövlətzadəyə ithaf edib. Gənc heykəltəraş bununla kifayətlənməyib. O, şəhidlərin təbəssümünü gələcək nəsillərə ötürmək üçün Rəssamlıq Akademiyasının emalatxanasından demək olar ki, ayrılmır. Heykəltəraşın hazırladığı növbəti kompozisiyanı isə ifası və şücaəti ilə ürəklərə sığınan Xudayar Yusifzadəyə həsr edib. Deyir ki, Xudayarla onu birləşdirən ortaq cəhət var. - «Xudayarla mənim, əslində, ortaq nöqtəmiz musiqidir. Mən də əvvəl musiqi ilə məşğul olmuşam. Çox sevirəm musiqini. Burda notları verməyim bir səbəbi də ondan ibarətdir. İki sənətin birləşməsi - hərb və musiqi. Mən özüm də heykəltəraşlıq və musiqi ilə məşğul olmuşam».
«Xudayar təsnifi» büstündə 22 yaşlı şəhid Xudayar Yusifzadə ilə yanaşı, Qarabağ müharibəsində döyüşən qəhrəman oğullarımızın da avazı, təbəsümü var».
Gənc heykəltəraş I və II Qarabağ Müharibəsində şəhid olan qəhrəmanların avazını növbəti kompozisiyasına ötürüb. Heykəltəraş bu yeni əsərində şəhidləri gil üzərində görüşdürür, onlara öz qəhrəmanlıqları haqqında daş dilində dastan söyləyir.
Ülviyyə Heydərova