Bakı Şəhər Mədəniyyət Baş İdarəsinin 24 nömrəli onbirillik musiqi məktəbi görkəmli Azərbaycan bəstəkarı Tofiq Bakıxanovun doğum günü ilə əlaqədar videoçarx hazırlayıb.
Videoçarx musiqi məktəbinin “Facebook” səhifəsində yayımlanıb.
Videoçarxda görkəmli bəstəkarın ömür yolu və fəaliyyəti haqqında məlumat verilir.
Bildirilir ki, Tofiq Bakıxanov 1930-cu il dekabrın 8-də Bakıda, görkəmli tarzən, Azərbaycanın Xalq artisti Əhməd Bakıxanovun ailəsində dünyaya göz açıb. O, XIX əsrdə Azərbaycanın məşhur alimi, tarixçisi, şairi və ictimai xadimi Abbasqulu ağa Bakıxanovun nəticəsidir.
Tofiq Bakıxanov ilk musiqi təhsilini Ü.Hacıbəyli adına Azərbaycan Dövlət Konservatoriyası (indiki Bakı Musiqi Akademiyası) nəzdində onillik musiqi məktəbində (indiki Bülbül adına orta ixtisas musiqi məktəbi) skripka aləti üzrə respublikanın Əməkdar müəllimi M.İ.Simberovdan alıb. Daha sonra Azərbaycan Dövlət Konservatoriyasında iki ixtisas üzrə təhsilini davam etdirib. Tələbəlik illərində T.Bakıxanov ifaçılıq fəaliyyəti ilə məşğul olaraq Azərbaycan Dövlət Simfonik Orkestrində, həmçinin Azərbaycan radiosunun simfonik orkestrində solist kimi çalışıb.
Qeyd edilir ki, bəstəkarın yaradıcılığında kamera-instrumental və simfonik janrlı əsərlər üstünlük təşkil edir. Onu da deyək ki, millilik, insanpərvərlik, həyati mövzulara müraciət, lirik-dramatik səpkili obrazlar dairəsi T.Bakıxanovun yaradıcılıq dəst-xəttinin səciyyəvi xüsusiyyətləri kimi daima diqqəti cəlb edir. Məhz buna görədir ki, T.Bakıxanovun milli ruhla aşılanmış əsərləri zəngin melodiya, lad-intonasiya, metroritmik quruluşu ilə fərqlənir. Bu da onun əsərlərinin ifaçılıq praktikasında və tədris repertuarında möhkəm yer tutmasını və Azərbaycandan kənarda da müvəffəqiyyətini təmin edən amildir.
Diqqətə çatdırılır ki, o, 1973-cü ildə Əməkdar incəsənət xadimi fəxri adına layiq görülüb.1983-cü ildə professor adı alıb. 1990-cı ildə ona Xalq artisti fəxri adı verilib. 1996-cı ildə Azərbaycan Milli Yaradıcılıq Akademiyasının incəsənət doktoru seçilib. Eləcə də 2000-ci ildə "Şöhrət" ordeni ilə təltif olunub.