Disney şirkəti fantastika janrında olan yeni filmləri və serialları haqqında video-çarx yayımlayıb. “Ulduz döyüşləri” seriyasından növbəti illərdə yayımlanacaq ekran əsərlərinin adları məlum olub.
Disney şirkəti təqdim olunacaq yeni ekran əsərlərinin adlarını açıqlamaqla kino pərəstişkarlarını sevindirib. Pandemiya dövründə filmləri internet kanalı vasitəsilə yayımlayan şirkət 87 milyona yaxın izləyici qazanıb və kütləni itirməmək üçün müntəzəm olaraq, maraqlı layihələr həyata keçirir. Bu dəfə isə “Marvel” və “Star Wars” seriyasından olan fantastik film və serialların video-çarxını təqdim edib. Dünyanın 6 nəhəng media şirkətindən biri olan Disney, insanların evdə səmərəli və əyləncəli vaxt keçirmələri üçün yaxın 2 ilin proqramını hazırlayıb. Belə ki, 2024-cü ilə qədər 10 yeni serial və 15 şounun yayımlanması nəzərdə tutulub. Bunlardan əlavə, “Disney Animation” və “Pixar”ın istehsalı olan animasiya filmləri, eləcə də kinosevərlərə tanış olan məşhur fantastik ekran işlərinin yeni seriaları təqdim olunacaq. “Disney” və digər şirkətlər yeni filmləri kinoteatrlarda təqdim edə bilmədikləri üçün xeyli miqdarda gəlir itirsələr də, bunu internet hesablarında birbaşa yayımlar və ödənişli abunələrlər tənzimləməyə çalışırlar. Ona görə də yeni siyahıya “Star Wars” seriyasından “Obi-Van Kenobi”, “Rangers of the new republic”, “Ashoka”, “Andor”, “Lando”, “Visions” filmlərinin də daxil olduğu 10 ekran işi daxil edilib.