Mirsəfa Rzayev ikinci Qarabağ müharibəsinin dənizçi qəhrəmanlarındadır. Səfərbərlik elan edildikdə Mirsəfa da vətən borcunu yerinə yetirmək üçün döyüşə çagrılır. Elə gözüyaşlı ana da oglunu son dəfə o zaman görür.
Mirsəfa Rzayev 1995-ci ildə Bakıda dünyaya göz açıb. Orta məktəbi bitirdikdən sonra Azərbaycan Dövlət Dənizçilik Akademiyasına qəbul olub. Akademiyanı bitirdikdən sonra isə 2017-ci ildə hərbi xidmətə yola düşüb. Döyüşlərdə şücaəti ilə seçilən şəhidimiz topçu olsa da, bunu anasına bildirməyib. Gözünün agı qarası bircə oglunu vətənə qurban verən Emulya ana deyir ki, Mirsəfa diplomunu alarkən, daha sonra işə qəbul olarkən yerə-göyə sığmırdı, çünki ixtisası üzrə işləmək üçün can atırdı. Bəli, dənizçi olmaq ona qismət oldu, amma o dənizdən də üstün vətənini bildi.
Mirsəfanın igidliyinə yaxşı bələd olanlardan biri də xalası Gövhər xanımdır. O, deyir ki, Mirsəfa onun yanında böyüyüb. Arzularından biri də çox sevdiyi xalasının onu evləndirməyi olub.
Topçu Mirsəfa Rzayev evlilik məramına çata bilməsə də, Füzuli ugrunda gedən döyüşlərdə ən gözəl mərama şəhidlik zirvəsinə ucalıb. Lakin şəhid olmadan əvvəl son dəfə anası, bacısı və demək olar ki, bütün dostları ilə danışıb. Bacısı dönə-dönə onunla fəxr etdiyini deyir.
15 yaşından atasını itirən Mirsəfa çətinlik, zəhmət bilən igid idi. Heç vətən çağıranda da bu çətin işdən geri çəkilmədi və Mirsəfa da adını Qarabağ müharibəsi tarixinə böyük hərflərlə yazdıran qəhrəmanımıza çevrildi. İndi ona məxsus guşədə qərənfillər solsa da, onun xatirəsi Qarabağ torpaqlarında əbədi çiçək açacaq. Məkanının cənnət olsun, bizim igid dənizçi şəhidimiz.