Mədəniyyət xadimləri Şuşanın azad olunması münasibətilə Fəxri Xiyabanı ziyarət ediblər

Şuşa mədəniyyətimizin beşiyidir. Şuşada doğulan neçə-neçə ustad sənətkarlar Azərbaycan mədəniyyətini dünyada tanıdıblar. Mədəniyyət və incəsənət xadimlərimiz Fəxri Xiyabanda onları yad edib. Bu tarixi xəbəri dünən bizə Ali Baş Komandan İlham Əliyev xalqa növbəti müraciətində söylədi.

İlham Əliyev: «Əziz Şuşa, sən azadsan! Əziz Şuşa, biz qayıtmışıq. Əziz Şuşa, biz səni dirçəldəcəyik! Şuşa bizimdir, Qarabağ bizimdir! Qarabağ Azərbaycandır!

Qarabağın baş tacı Şuşa Azərbaycanın ürəyindən mənəviyyatına aparan yoldur. Bu yolu isə o müqəddəs torpağın havasından udub, suyundan içən, orada böyüyüb boya-başa çatan dahi Üzeyir bəy Hacıbəyli, Vasif Adıgözəlov, Suleyman Ələsgərov, Rəşid Behbudov, Mehdi Məmmədov, Lətif Kərimov, Fikrət Əmirov, Nizayi, Bülbül Azərbaycan mədəniyyətini çiyinlərində ləyaqətlə daşıyıblar və bu gün onların da ruhu şaddır. Mədəniyyət və incəsənət xadimləri bu tarixi gündə Fəxri Xiyabana gələrək Şuşanın adını həmişə ucalara qaldıran görkəmli şəxsiyyətlərimizin məzarını ziyarət etdilər, əziz xatirələrini andılar. İlk olaraq dahi Üzeyir bəyin məzarı ziyarət olundu. Mədəniyyət nazirinin müavini Anar Kərimov bu tarixi qələbənin Azərbaycan mədəniyyəti üçün əhəmiyyətindən söz açdı: «1982-ci ildə ulu öndərimiz Molla Pənah Vaqifin məqbərəsinin açılışında iştirak edib. 10 il sonra erməni vəhşiləri, şuşamızı əlimizdən almışdı. 28 ildən sonra Ali Baş komandanımız, şanlı ordumuz Şuşanı bizə qaytardı və mən əminəm ki, biz Şuşanın bütün muzeylərini, abidələrini, ümumiyyətlə onun ruhunu yenidən geri qaytaracağıq».

Azərbaycan xalqının ümummilli lideri Heydər Əliyevin xatirəsini hörmət və ehtiramla yad edildi, məzarı üzərinə gül dəstələri qoyuldu. Azərbaycan Yazıçılar Birliyinin sədri Xalq yazıçısı Anar qələbəmizin əsas ilhamvericisi məhz ulu öndər Heydər Əliyevin olduğunu söylədi: «Gəldik rəhmətlik Heydər Əliyevin qəbiri üstünə. Çünki bu qələbənin ilhamvericisi odur. İlhamvericisi o mənada k, həm İlhamı verib, bizə bağışladı, həm də onun verdiyini ilhamla bizim əsgərlərimiz Qarabağa gedib azad elədilər, Şuşanı azad elədilər».

Azərbaycan Bəstəkarlar İttifaqının sədri Firəngiz Əlizadə: «Sevincimiz sevincə qarışıb, dünən gözəl Şuşamız işğaldan azad olundu. Bu gün də bizim bayraq bayramımızdır. Addım, addım bu bayraq bütün günü kəndlərdə, şəhərlərdə və nəhayət Şuşada qaxldı və göylərə çıxdı».

Teatr Xadimləri İttifaqının sədri Azər Paşa Nemət: «Qaraba əsarət altında idi. Bu gün azad olub. bu gün bütün dünya bunu görür, qəbul edir. biz azərbaycanlılar nəinki sevinirik. Həddi hüdudumuz yoxdur ki, bu sevinci kimləsə bölüşmək istəyir…. Yaşasın Qarabağ!»

Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli: «Cənab Prezident dedi, Biz qapyıdırıq, Şuşa. Bax, o sözləri deyəndə vallah, mən özüm-özümə dedim ki, mən fəxr edirəm ki, azərbaycanlıyam. Ulu öndərin sözünü təkrar elədim…. İnanıram, Şuşanı gözəl günlər gözləyir».    

Şanlı qələbə həm də sevinc gözyaşları ilə yadda qaldı. Ömrünün sonuna kimi «Şuşam lay-lay» deyən bəstəkar Vasif Adıgözəlovun yadigarı Xalq artisti Yalçın Adıgözəlov da atasına gözaydınlığı verməyə gəlmişdi.

Xalq artisti Yalçın Adıgözəlov: «Gözümüz aydın olsun! Böyük qələbə günü. Sevincimizin, həyəcanımızın həddi -hüdudu yoxdur. Çünki biz bu günü gördük. Bizə qismət oldu. Şəhidlərimizin ruhu şad olsun! Şanlı ordumuz sağ olsun! Ali Baş Komandan qızıl hərflərlə yazdırdı adını tarixə. Yeni Azərbaycan tarixi yarandı artıq».

Əməkdar artist, dirijor Fuad İbrahimov Şuşadan məcbur köçəndə cəmi 10 yaşı vardı. O, daha bundan sonra doğma Şuşası üçün darıxmayacaq.

Əməkdar artist Fuad İbrahimov: «Bir şuşalı olaraq yaşadığım hissləri əlbəttə ki, sözlə ifadə etmək çətindir. Ən gözəl günləri, ən gürurlu günləri biz yaşayırıq. Bunun üçün əlbəttə cənab Prezidentə, ali baş komandana dərin təşəkkürümü bilmirmək istəyirəm»ş.

Daha bir dirijor Mustafa Mehmandarov əslən şuşalı olsa da, o torpaqlarımızı yalnız arxiv materiallarından izləyib.

Mustafa Mehmandarov - dirijor: «Mən doğuduğum ili  Şuşa əfsuslar olsun ki, bir ay idi ki, işğal olunmuşdu. Əlbəttə mən oranı görməsəm də Şuşanın həsrəti ilə, ümumiyyətlə, qarabağın həsrəti ilə… əlbəttə ki, babamızın evinə gemək istəyirəm. Onların məzarları orada hələ də qalıbsa, onları mütləq ziyarət edəcəm».

Əziz Şuşa, daha azadsan! Öz evində rahat nəfəs al! Dinlə Üzeyir bəyin «Cəngi»sini, Şanlı Ordumuza da ruh ver.

 

Ulviyyə Heydərova