Ramil Qasımov: “Bu gün hər bir azərbaycanlı vətəninə faydalı olmağa çalışır”

Sentyabrın 29-dan etibarən “Mədəniyyət” kanalında “Mən də əsgərəm” layihəsi yayıma başlayacaq.

Müdafiə Nazirliyi və Mədəniyyət Nazirliyinin birgə layihəsi həftəiçi 5 gün saat 20:00-dan 21:00-a  kimi efirdə olacaq.

Layihənin ideya müəllifi Mədəniyyət TV-nin direktoru Əməkdar artist Ramil Qasımovdur. O, layihənin mədəniyyət sahəsində çalışan şəxslərə böyük vüsət yaradacağını düşünür: “Bu gün hər bir vətəndaş bir əsgərdir. Öz xidməti sahəsində çalışan hər bir azərbaycanlı vətəninə faydalı olmağa çalışır. Yaradıcı heyətlə düşündündüyümüz layihə, zənnimcə, mədəniyyət  sahəsində  çalışan həmkərlarımıza böyük vüsət yaradacaq. Şair, musiqiçi, aktyor, rəssam, heykəltaraş, bir  sözlə,  hər  bir  mədəniyyət  sahəsində çalışan  şəxsin verilişdə iştiraki nəzərdə tutulur”.

Xatırladaq ki, ilk verilişin qonaqları Bəstəkarlar İttifaqının sədri, Xalq artisti Firəngiz Əlizadə və Xalq artisti Samir Cəfərov olacaq.

Verilişin  aparıcısı Əməkdar artist Elnur Kərimovdur.