Onları görəndə, nədənsə, uşaqlığımı xatırlayıram. Televizor önündə əyləşib böyük maraqla onlara baxardım. Nədənsə mənə elə gələrdi ki, onlar da ekranın o tayından məni görürlər. Gündəlik verilişlərin proqramını hər iki dildə oxuyardılar. Tez kağız, qələm götürüb maraqlı verilişlərin, cizgi filmlərinin vaxtlarını özüm üçün qeyd edərdim. Yəqin ki, bu səbəbdən müsahibimiz məndə doğmalıq hissi yaradır. Qayğısız uşaqlığıma qayıdıb, həmin günləri xatırladır mənə. Bu gün – 6 sentyabrda doğum gününü qeyd edən gözəl xanım, qayğıkeş ana, mehriban nənə, savadlı diktor, məlahətli səs sahibi Əməkdar artist (2014) Sevda Ağazadədir müsahibimiz. Sevda xanımla söhbətimizə ənənəvi sualdan başladıq:
- Sevda xanım, ən yaddaqalan ad gününüz hansı olub?
- Umumiyyətlə, ad günlərimi keçirməyi çox sevirəm. Fərq etmir, neçə yaşım olursa olsun, 15 və ya 60,70. Hər il ad günümü böyük həyəcanla gözləyirəm. Ən yaddaqalanı isə 60 illiyim oldu. İşdə mənə çox xoş sürpriz etdilər. Çox yüksək səviyyədə keçirildi ad günüm. Gözlənilməz oldu mənim üçün. Və elə həmin ad günümdə oğlum, gəlinim və nəvələrim də mənə sürpriz etdilər. Bir ağ qutu bağışadılar mənə. Ətirləri çox sevdiyim üçün düşündüm ki, uşaqlarım zövqümü bilir, deyəsən, xoşladığım ətri alıblar. Qutunu açanda gördüm ki, çoxdan almaq istədiyim mobil telefondur. Arzuladığım hədiyyəni övladlarımdan almaq çox xoş idi.
Solda Sevda Ağazadə
- Yeri gəlmişkən, hansı hədiyyələri almağı sevirsiniz?
- Hədiyyə almağı da, bağışlamağı da çox sevirəm. Kiməsə sürpriz etməyi, sevindirib təəccübləndirməyi sevirəm. Mənim üçün hədiyyənin qiyməti və böyük-kiçikliyi yoxdur. İstənilən, ən kiçik hədiyyə sənə olan böyük diqqətin göstəricisidir. Və mənə bağışlanan hədiyyələri mütləq istifadə edirəm, heç kimə bağışlamıram.
Xalq artisti Eldost Bayramla
- Diktorluğa maraq sizdə necə yarandı?
- Uşaq vaxtımdan. 5 yaşım olardı, evdə deyirdim ki, mən diktor olacam. İllər keçdi, orta məktəbi qızıl medalla bitirib Neft və Sənaye İnstitutuna, indiki Azərbaycan Dövlət Neft Akademiyasına daxil oldum. İnstitutu bitirdikdən sonra bir neçə il ixtisasıma uyğun olaraq Elmlər Akademiyasının Energetika İnstitutunda mühəndis kimi çalışdım. O zaman diktor olmaq istəyənlər üçün televiziyada müsabiqə elan olunmuşdu. Cəmi 1 yer var idi. Çox böyük əziyyətlərlə, 3 ay davam edən 300 nəfərlik müsabiqə bitdi. Tək mən keçdim bu müsabiqədən və qalib oldum. Böyük çətinliklərlə üzləşdım, amma üzərimdə çox çalışdım. Və bunu özüm üçün böyük fəxr bilirəm...
"Xəbərlər"i oxuyarkən
- Kimlərə tamaşa edib öyrənmisiniz, kimləri özünüzə müəllim hesab edirsiniz?
- Müəllimlərim mənimlə bir yerdə çalışan, məndən bir nəsil böyük olan diktorlardır. Üzərimdə hər birinin əməyi olduqca böyükdür. Başda Rafiq Hüseynli olmaq şərtilə.
O insanda çox böyülkük gördüm. Baxmayaraq ki, mənimlə həmişə çox ciddi və rəsmi davranardı. Başqa diktorlarla səmimi olduğu halda, mənimlə daha ciddi və rəsmi idi. Buna görə də hər zaman elə düşünürdüm ki, Rafiq müəllimin məndən xoşu gəlmir. Diktorlar otağında həftəlik iş cədvəllərı tərtib olunurdu. Hər dəfə o cədvəllərə baxıb adımı görəndə düşünürdüm ki, yox, hamıyla necə, məninmlə də elə davranır Rafiq müəllim. Və bir gün rəhbərliyin iştirakı ilə diktorların tarifikasiyası (ixtisas dərəcəsinin tənzimlənməsi) keçirilirdi. Mən içəri daxil olanda Rafiq müəllim məni bu cür təqdim etdi: “Siz əgər savadlı və səliqəli diktor görmək istəyirsinizsə, o, sizin qarşınızdadır”. Mən bunu gözləmirdim. O, çox diqqətçil və hər şeyə fikir verən insan idi. Və bir daha sübut etdi ki, onun üçün stajlı və ya yeni gələn, təcrübəsiz işçi olsun, heç biri fərq etmir. Hamıya eyni cür yanaşırdı.
“Xəbərlər” informasiya proqramını oxumağa bizim nəsil diktorlardan ilk dəfə Nərgiz Cəlilova, Nailə İslamzadə, Aygül Qaradağlı və mən çıxdıq. Bizimlə öncə nümunə çəkilişləri etdilər. O zaman iki nəfər - qadın və kişi diktoru oxuyurdu xəbərləri. Mən gözləmirdim ki, Rafiq müəllim məni də özüylə yazacaq. Onda da Rafiq müəllim mənə böyük dəstək, kömək oldu. Mən bu yaxşılıqları itirə bilmərəm. O, böyük sənətkar və çox böyük insan idi.
Xalq artisti Rafiq Hüseynli ilə
-Sevda xanım, bir zamanlar hamının böyük maraqla izlədiyi “Həyatın bir anı” verilişini aparırdınız. Kifayət qədər tamaşaçı auditoriyanız da var idi. Daha ekranlarda görünmürsünüz. Hazırki fəaliyyətiniz barədə məlumat verərdiniz tamaşaçılarınıza...
- Hazırda Azərbaycan Televiziyasının “Kinoproqramlar və dublyaj” redaksiyasında aparıcı ssenaristəm. “Film haqqinda film” verilişinin ssenari müəllifi, “Məmləkətim” filmlər silsiləsinin redaktoruyam. Redaksiyamızın ərsəyə gətirdiyi onlarla portret verilişlərin, sənədli filmlərin ssenari müəllifi və redaktoruyam. 2019-cu ildən Azərbaycan Kinematoqrafçılar İttifaqının üzvüyəm. Teleradio Akademiyasında aparıcı və müxbirlərə nitq mədəniyyəindən dərs deyirəm...
Xalq artisti Ayaz Salayev "Səhər" proqramında Sevda xanımın qonağıdır
- Bəs Teleradio Akademiyasında dərs demək dəvəti kim tərəfindən gəldi sizə?
- Dəvət mənə bu il gəldi. Rəhbərliyimiz və Akademiyanın rektoru Faiq Hüsiyevin dəvətləri ilə Teleradio Akademiyasında çox böyük həvəslə dərs deməyə başladım. Gənclərlə işləməyi çox sevirəm, onlarla ünsiyyətdən böyük zövq alıram. Əvvəllər də gənc aparıcı və müxbirlərlə çalışmışam. Dərsdə zamanın necə keçdiyini belə hiss etmirəm. Bu dəfə də dərs deyəndə özümə çoxlu dostlar qazandım. Bu gün o tələbələrim məni dəhlizdə görür, salamlaşır, zəng vurub əhvalımı soruşurlar. Və tədris müddətində gənclərlə bir müsabiqə də keçirdik – kiçik hekayələr müsabiqəsi. Çox böyük marağa səbəb oldu həmin müsabiqə. İnşallah, bu dəfə də Akademiyada dərslər başlayanda həmin müsabiqəni yenidən daha yüksək səviyyədə keçirərik.
Teleradio Akademiyasında çıxışı zamanı
- Sevda xanım, maraqlı müsahibə üçün təşəkkür edir və ad gününüzü təbrik edirik!
- Mən də təşəkkür edirəm. Çox sağolun.
Sevda xanım sənət yoldaşları ilə
Gülər Sadıqova Şərifi