Azərbaycan Vokalçıları Festivalı çərçivəsində Azərbaycan Dövlət Akademik Musiqili Teatrının solistlərinin möhtəşəm konserti keçirilib.
Əməkdar İncəsənət xadimi Fəxrəddin Atayevin rəhbərlik etdiyi orkestr elə ilk dəqiqələrdən zalda xüsusi atmosfer yaradıb. Teatrın direktoru, Əməkdar İncəsənət xadimi Əliqismət Lalayev giriş sözündə respublikamızda ilk dəfə keçirilən festivalın böyük əhəmiyyətindən danışıb, səhnəyə festivalın ideya müəllifi və bədii rəhbəri, "Mədəniyyət" telekanalının direktoru Ramil Qasımovu dəvət edib. Ramil Qasımov çıxışında operetta janrının Azərbaycanda böyük tarixi olduğunu qeyd edərək, vurğulayıb ki, zamanında bu teatrda Lütfiyar İmanov, Kamal Kərimov, Mobil Əhmədov kimi unudulmaz sənətkarlar çalışıb, vokal sənətinin tarixində silinməz izlər qoyublar.
Sonra Ramil Qasımov tamaşaçılara gözəl ifası ilə unudulmaz dəqiqələr bəxş edib. Gecənin sonuna qədər davam edən tədbirdə gənc vokalçıların bütün çıxışları gürultulu alqışlarla qarşılanıb. Konsertdə Azərbaycan opera və operetta incilərinin ən parlaq nümunələri yer alıb. Anşlaqla keçən möhtəşəm konsert böyük rezonansa səbəb olub.
Fotolar Rüstəm İsmayılovundur