Gənc nəsildə kreativ düşüncənin inkişafına xidmət məqsədilə “Heydər Əliyev İli” çərçivəsində ənənəvi “Mənim düşüncəm” adlı respublika uşaq rəsm müsabiqəsi elan olunub.

Bu barədə Xətai Sənət Mərkəzinin direktoru Zahid Əvəzov bildirib.

Qeyd edilib ki, müsabiqə Mədəniyyət Nazirliyi, Elm və Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə keçirilir.

Müsabiqənin şərtləri barədə məlumat verən Z.Əvəzov deyib: “9-21 yaşarası yaradıcılıq qabiliyyəti olan şəxslər oktyabrın 2-dək əsərinin fotosu ilə bərabər, əsərin adı, müəllifin soyadı, adı ,təvəllüdü, təhsil aldığı məktəbi və əlaqə nömrəsini dusuncem23@gmail.com ünvanına göndərməklə müsabiqəyə qatıla bilər. Seçimdə fərqli fikir və kreativ düşüncəli yaradıcılıq nümunələrinə üstünlük veriləcək. Müsabiqəyə təsvir və tətbiqi sənət nümunəsi ilə yanaşı, bir texnologiya ilə də qatılmaq olar. Təkrar olmayan , müdaxilə olunmamış (müəllim, valideyn,.. ) və əvvəlcə sərgilənməmiş əsərlərə üstünlük veriləcək. Seçim müəlliflərin yaşı nəzərə alınmaqla aparılacaq. Mövzu, ölçü və texnika sərbəstdir. Əsərlər tək-tək göndərilməli, məlumatlar dolğun olmalı, ən çoxu 2 əsər göndərilməlidir. Müsabiqədə xarici ölkə vətəndaşları da iştirak edə bilərlər. Əsəri sərgidə nümayiş olunan müəlliflər sertifikatla və fəal tədris mərkəzləri (dərnək, incəsənət məktəbi və s.) təşəkkürnamə ilə təltif olunacaqlar. Müsabiqənin yekun sərgisi Xətai Sənət Mərkəzində təşkil olunacaq”.