Səttar Bəhlulzadənin ev-muzeyinə hədiyyə olunan yeni eksponatların təqdimatı keçirilib.
Muzeyin direktoru Pərzad Abdinova bu il Xalq rəssamı Səttar Bəhlulzadənin 115 illik yubileyinin olduğunu bildirib, bugünkü təqdimatın il ərzində keçiriləcək tədbirlər silsiləsindən biri olduğunu qeyd edib. P.Abdinova hədiyyə edilən eksponatların muzeyin fondunun zənginləşdirilməsində çox mühüm olduğunu vurğulayıb, hədiyyələrə görə dərin təşəkkürünü bildirib.
Mədəniyyət Nazirliyinin İncəsənət və qeyri-maddi mədəni irs şöbəsinin müdiri Sevil Kərimova böyük rəssamın yubileyi ilində keçirilən təqdimatı uğurlu addım kimi qiymətləndirərək, xalqımızın tarixi və mədəni irsinin qorunmasında muzeylərin rolundan danışıb.
Xalq rəssamı Hüseyn Haqverdiyev muzeyə bağışladığı yeni əsərini – Səttar Bəhlulzadənin gipsdən düzəltdiyi heykəlini təqdim edib, çıxışı zamanı heykəlin yaranma ideyası haqqında məlumat verib, S.Bəhlulzadə haqqında xatirələrini bölüşüb.
Daha sonra H.Haqverdiyevin ev-muzeyinə bağışladığı, Səttar Bəhlulzadənin rəsmlərinin təsvir olunduğu slaydların təqdimatı olub.
Xətai Sənət Mərkəzinin direktoru Zahid Əvəzov muzeyə bağışladığı “S.Bəhlulzadənin portreti”ni təqdim edib, əsərin müəllifi, Beynəlxalq Sulu boya Cəmiyyətinin sədri (IWS Globe) rəssam Atanur Doğan haqqında məlumat verib, əsərin yaranma tarixçəsindən danışıb.
Azərbaycan Fotoqraflar Birliyinin təsisçisi, tanınmış fotoqraf Mirnaib Həsənoğlu S.Bəhlulzadəyə aid arxiv slaydlarını muzeyə bağışlayıb. O, çıxışında fotoarxiv materiallarının tarixi önəmindən söz açıb, onların qorunmasının vacibliyini vurğulayıb.
Daha sonra S.Bəhlulzadənin Tretyakov Qalereyası (Moskva ş.) və Şərq Muzeyində (Moskva ş.) qorunan əsərlərindən ibarət videoçarx nümayiş edilib.
Pərzad Abdinova rəssamın mənzərə və natürmortların keyfiyyətli elektron nüsxələrinin əldə edilməsi prosesindən danışıb, bu materialların rəssamın yaradıcılığının tədqiqi işində əhəmiyyətindən bəhs edib.
Sonda S.Bəhlulzadənin ev-muzeyinin kolleksiyasından rəssamın qrafik əsərlərindən və şəxsi kolleksiyalarda qorunan Qarabağ mövzusuna aid etüd və əsərlərindən ibarət sərgi ilə tanışlıq olub.
Sərgidə “Şuşa şəhəri. Murovdağ”, “Cıdır düzü”, “Şuşa. Turşsu”, “Xankəndi” və digər etüdlər nümayiş edilib.
