Xalq rəssamı Mirələsgər Mirqasımov - fikrini daşa söyləyən heykəltəraş

10 Fevral, 11:45 Sosial mediada paylaşın:

Xalq rəssamı Mirələsgər Mirqasımovun yaratdığı əsərlər müasir Azərbaycan heykəltaraşlığı tarixində mühüm yer tutur.

Heykəltəraş Mirələsgər Mirqasımov arzularının fəhləsi idi. Repin adına Leninqrad Boyakarlıq, Heykəltəraşlıq və Memarlıq İnstitutunu bitirən sənətkar ilk ali təhsilli peşəkar Azərbaycan heykəltəraşı kimi sənət tariximizə düşüb. Onun əsərləri yalnız Azərbaycanda deyil, Rusiya, Polşa, Bolqarıstan, Almaniya, Kanada, Misir və başqa ölkələrdə uğurla nümayiş olunub. İstəklərini daşa köçürmək ona min bir əziyyətlə başa gəlsə də, o, böyük inamı, daş səbri, fitri istedadı sayəsində yaratdığı heykəllərə yaşamaq haqqı verirdi.

Bakının mərkəzində ucaldılan yeganə monumental əsəri - Cəfər Cabbarlının heykəli də Mirələsgər Mirqasımovun istedadı ilə yanaşı, əzmkarlıq nümunəsidir. 1959-cu ildə Cəfər Cabbarlının heykəli müsabiqədən uğurla keçsə də, heykəltəraşın fikirlərinə zidd gedənlər onun nəinki illərini əlindən alır, üstəlik iki dəfə infaktla üz-üzə qoyur. Yalnız 1979-cu ildə ümummilli lider Heydər Əliyevin heykəltəraşın emalatxanasını ziyarət etməsi bütün məsələlərin həllinə yol açır. Çox keçmir ki, sənətkar qranitdən Cəfər Cabbarlının əzəmətini yaratmağa nail olur.

Sənətkar səhhəti ilə bağlı həmişə əziyyət çəkib. O, danışa bilməsə də nəinki insanların, daşın da dilini gözəl anlayırdı. Ömrü boyu fikrini daşa söyləyən hekyəltəraş nə qəlbini daşa çevirdi, nə də ruhunu.

 

Ülviyyə Heydərova

CANLI YAYIM