“Azərbaycan və İran həkimlərinin fədakarlığı iki ölkə yeniyetmələrinin baxışında” adlı rəsm müsabiqəsinin mükafatlandırma mərasimi olub

20 Avqust, 17:09 Sosial mediada paylaşın:

İran İslam Respublikasının (İİR) Azərbaycandakı səfirliyinin Mədəniyyət Mərkəzində COVID-19 qlobal pandemiyası dövründə “Azərbaycan və İran həkimlərinin fədakarlığı iki ölkə yeniyetmələrinin baxışında” adlı onlayn sərgi-müsabiqənin və “Həyatı bahasına həyat qurtaranlar” adlı onlayn fotosərginin mükafatlandırma mərasimləri təşkil olunub.

Mərasimdə hər iki ölkənin koronavirusla mübarizə aparan həkimləri, media nümayəndələri və yeniyetmə rəssamları iştirak ediblər.

Əvvəlcə, COVID-19 qlobal pandemiyası dövründə koronavirusla mübarizədə həyatlarını itirmiş həkimlərin, tibb işçilərinin xatirəsi bir dəqiqəlik sükutla yad edilib. İİR-in Azərbaycandakı səfirliyinin Mədəniyyət Mərkəzinin sədri Əsğər Farsi çıxışında Azərbaycan və İran dostluğunun tarixindən söz açaraq, COVID-19 qlobal pandemiyası zamanı İran xalqına ilk kömək edən məhz Azərbaycanın olduğunu və bunun iki ölkənin qədim və dərin dostluq dəyərlərinə söykəndiyini nəzərə çatdıraraq minnətdarlıq edib. O, ölkələrimiz arasında mədəni əlaqələrin daim yüksək səviyyədə inkişafı üçün belə layihələrin həyata keçirilməsinin vacibliyini nəzərə çatdıraraq, Yasamal rayon Heydər Əliyev Mərkəzinin direktoru Naminə Ömərovaya və hər zaman bir-birindən dəyərli ölkələrarası dostluğun inkişafına layihələri ilə xidmət edən Azərbaycan Rəssamlar İttifaqının üzvləri, rəssam, təşkilatçı Elnurə və Aygün İsgəndərovalara təşəkkürünü bildirib.

Yasamal rayon Heydər Əliyev Mərkəzinin nümayəndəsi Günel Həsənova öncə layihə iştirakçılarını təbrik edib və əməyi olan hər kəsə təşəkkürünü bildirib. Günel xanım Yasamal rayon Heydər Əliyev Mərkəzinin koronavirus pandemiyası dövründə bir çox səfirliklərlə birgə əməkdaşlıq edərək onlayn sərgi-müsabiqələr, bir sıra sosial layihə və tədbirlər həyata keçirdiyini nəzərə çatdıraraq, belə gözəl layihələrin davamlı olmasını arzu edib.

Öz növbəsində layihə rəhbəri Elnurə İsgəndərova və təşkilatçı Aygün İsgəndərova həyatlarını riskə ataraq xidmət göstərən həkimlərə, polislərə, hərbçilərə və layihələrdə əməyi olan, iştirak edən hər kəsə təşəkkürlərini bildiriblər.

Sonra layihələrin iştirakçıları olan həkimlərin, media nümayəndələrinin, yeniyetmə rəssamların mükafatlandırma mərasimi keçirilib.

CANLI YAYIM