Mədəniyyət Nazirliyinin dəstəyi ilə Heydər Əliyev Sarayında Azərbaycanın görkəmli bəstəkarı, Xalq artisti Emin Sabitoğlunun anadan olmasının 85 illiyi qeyd olunub.
Yubiley gecəsində Azərbaycanın tanınmış mədəniyyət və incəsənət nümayəndələri, Xalq artistləri Brilliant Dadaşova, Flora Kərimova, Azər Zeynalov, İlqar Muradov, Gülyaz və Gülyanaq Məmmədovalar, Əməkdar artistlər Nuriyyə Hüseynova, Elton Hüseynəliyev, Şölə Səfərəliyeva, Lalə Məmmədova, Eldar Məmmədov, İsgəndər Ələsgərov, Ruslan Hüseynov, müğənnilər Rəvanə Qurbanova, Arzu Həsənli, Zabitə Əliyeva, Fəxri Kazım Nicat, Humay Qədimova, Emin Səlimov, Lütfiyar Əliyev, Anar Abbasov, Toğrul Qasımov və Əkbər Əliyev çıxış ediblər. Gecədə bəstəkarın illərdi sevə-sevə dinlədiyimiz, hər birimizin dillər əzbəri, həyatımızın bir parçası olan unudulmaz əsərləri müğənnilərin ifasında səslənib.
Qeyd edək ki, yazıçı Sabit Rəhmanın ailəsində anadan olan Xalq artisti Emin Sabitoğlu bir sıra məşhur mahnıların müəllifi, çoxsaylı Azərbaycan filmlərinin musiqilərinin bəstəkarıdır. O, 1961-ci ildə "Azərbaycanfilm" kinostudiyasında musiqi redaktoru vəzifəsində çalışıb. Sonrakı illərdə Dövlət Filarmoniyasında bədii rəhbər, Üzeyir Hacıbəyli adına Dövlət Konservatoriyasında (indiki Bakı Musiqi Akademiyası) müəllim işləyib. Bəstəkar 1 simfoniya, 3 simfonik poema, 3 kantata, simli kvartet, skripka və fortepiano üçün poema yazıb. Lakin bir neçə musiqi janrı onun yaradıcılığının əsasını, müəyyənedici hissəsini təşkil edir. O, 600-dən artıq mahnı, 9 musiqili komediya, 40-a yaxın filmə musiqi bəstələyib. "Şükriyyə", "Bakı, sabahın xeyir", "Uzaq yaşıl ada", "Payız gəldi", "Aman ayrılıq" mahnıları çoxsaylı əsərlərindən bəziləridir. Tamaşalara da yazdığı musiqilər o qədər çoxdur ki, sayını heç bəstəkarın özü də doğru-dürüst bilmirdi. Paytaxt teatrları ilə yanaşı Sumqayıt, Gəncə, Lənkəran, Mingəçevir, Naxçıvan teatrlarının tamaşalarına musiqi bəstələyib.
Bəstəkar 2000-ci ildə vəfat edib.