“Dəmir yumruq” baletinin premyerası keçiriləcək

İyunun 14-də Üzeyir Hacıbəyli adına Bakı Musiqi Akademiyasının (BMA) Opera studiyasında “Şuşa İli”nə həsr olunmuş ilk balet - “Dəmir yumruq” zəfər baletinin premyerası keçiriləcək.

Şanlı Ordumuzun 44 gündə yazdığı qəhrəmanlıq salnaməsinin kulminasiyası - Şuşa zəfərini tərənnüm edən balet tamaşasında hadisələr simvolik olaraq məhz 44 dəqiqə çərçivəsində cərəyan edir. Bir pərdəli balet Əməkdar artist Yuri Lobaçevin librettosu əsasında yazılıb. Baletin bəstəkarı, Azərbaycan Bəstəkarlar İttifaqının Gənclərlə iş bölməsinin rəhbəri, Bakı Musiqi Akademiyasının doktorantı və elmi tədqiqat mərkəzinin əməkdaşı İlahə Qismət, baletmeysterləri isə Əməkdar artistlər Yuri Lobaçev və Ceyhun Qubadovdur. Əsər Bakı Xoreoqrafiya Akademiyasının məzunlarının təqdimatında diplom işi olaraq səhnələşdiriləcək.