"Rənglənmiş tarix" Şuşa musiqiçilərinə məxsus sənədli abidələrin qorunması və təbliğatı layihəsi çərçivəsində təşkil olunan növbəti fotosərgilər Şəki və Şamaxı rayonlarında baş tutub.
Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Uşaq və Yeniyetmələrə Dəstək” ictimai birliyi (UYD) tərəfindən Şəki və Şamaxı rayon İcra Hakimiyyətlərinin və Regional Mədəniyyət İdarələrinin təşkilati dəstəyi ilə həyata keçirilib.
Şəki şəhər Uşaq İncəsənət Mərkəzinin inzibati binasında baş tutan sərgidə 100-dən çox gənc, eləcə də, təhsil və mədəniyyət işçiləri iştirak ediblər. Növbəti sərgi Şamaxı şəhər İncəsənət Təhsili Mərkəzinin inzibati binasında baş tutub. Tədbiri açan İsmayıllı Regional Mədəniyyət İdarəsinin Şamaxı rayonu üzrə baş məsləhətçisi Rafael Tağızadə Şuşa musiqiçilərinin tanıdılmasında layihənin icrasının önəmindən söz açıb. UYD-nin sərdi Fərhad Abdulov layihənin məqsədinin Şuşa musiqiçilərinə məxsus sənədli abidələrin qorunmasında və təbliğatında gənclərin rolunun artırılması olduğunu qeyd edib, layihə çərçivəsində rənglənən fotolardan bəhs edib.
Daha sonra sərgi iştirakçıları Şuşa musiqiçilərinin rənglənmiş fotoları ilə tanış olublar. Tədbir Şuşaya həsr olunmuş canlı ifalarla davam edib.
Sonda sərgi iştirakçılarına onları informasiya müharibəsində, o cümlədən sosial platformalarda Şuşa musiqiçiləri haqqında məlumatlılığın artırılmasında fəal olmağa təşviq edən bukletlər paylanıb.
Məlumat üçün qeyd edək ki, layihə çərçivəsində rənglənmiş fotolar arasında Üzeyir Hacıbəyli, Bülbül, Cabbar Qaryağdıoğlu, maestro Niyazi, Ceyhun Hacıbəyli, Fikrət Əmirov, Xan Şuşinski, Rəşid Behbudov, Seyid Şuşinski, Soltan Hacıbəyli, Süleyman Ələsgərov kimi musiqiçilərin şəkilləri yer alıb.