Nizami Kino Mərkəzində, Mədəniyyət Nazirliyinin sifarişi ilə “Salnaməfilm” studiyası tərəfindən hazırlanmış Milli Qəhrəman, şəhid general-mayor Polad Həşimova həsr olunmuş "Poladın izi ilə" adlı sənədli filminin təqdimatı olub.
Mədəniyyət nazirinin birinci müavini Elnur Əliyev çıxış edərək ekran əsəri barədə məlumat verib. Bildirilib ki, film Polad Həşimovun həyatı və keçdiyi şanlı döyüş yolundan bəhs edir.
“Bu bizim millətimizin gücü və iradəsidir ki, Vətən müharibəsi ilə biz özümüz-özümüzə qayıtdıq, özümüzü millət olaraq kəşf etdik. Bütün bu proseslər təbii ki, qəhrəmanlarımızın sayəsində baş verib. Qəhrəmanların mövcudluğu həmin millətin keyfiyyətinin göstəricisidir. Tarixin özü də həmişə böyük, qüdrətli millətlər tərəfindən yazılıb. Böyük, qüdrətli millətlərin tarixini isə onların qəhrəmanları yazırlar. Polad Həşimov şəhid olanda da minlərlə onun kimi qəhrəmanlar doğuldu", - deyə Elnur Əliyev söyləyib.
Türkiyənin Azərbaycandakı səfiri Cahit Bağçı çıxış edərək Azərbaycanla Türkiyə arasında olan sarsılmaz qardaşlıq bağlarından danışıb. Daha sonra şəhidlik zirvəsinin ölməzliyindən bəhs edən səfir bildirib ki, Vətən uğrunda, bayraq uğrunda, torpaq uğrunda, şəhid olanlar Allahın müqəddəs kitabında deyildi kimi, ölülər deyil, dirilər sayılırlar. Səfir bütün şəhidlərin valideynlərinə, başsağlığı verib.
Ekran əsərinin rejissoru və ssenari müəllifi Zamin Məmmədov filmin çəkilişləri ilə bağlı təəssüratlarını bölüşüb.
Sonra şəhid general-mayor Polad Həşimovun anası Səmayə Həşimova və onun həyat yoldaşı Ofelya Həşimova filmin ərsəyə gəlməsində əməyi olan şəxslərə, eləcə də Mədəniyyət Nazirliyinə təşəkkür edib, şəhid haqqında öz xatirələrini bölüşüblər.
Sonra film nümayiş edilib. Filmin rejissoru və ssenari müəllifi Zamin Məmmədov, operatoru Fahir İmamquliyev, prodüseri Nazim Hüseynov, məsləhətçisi Vüqar Əsgərov, montajçısı Sabir Əskərzadə, səs rejissoru Mehman Nadirovdur.