Bakı Kitab Mərkəzində SSRİ, Azərbaycan və Rusiyanın Xalq rəssamı, müasir dünya təsviri incəsənətinin ən görkəmli nümayəndələrindən biri Tahir Salahovun həyat və yaradıcılığına həsr edilmiş “Dialoq” kitabının təqdimatı olub.
“Heydər Əliyev Fondunun vitse-prezidenti Leyla Əliyevanın ideya müəllifi olduğu “Dialoq” kitabı üzərində iş 2017-ci ildə başlansa da 2021-ci ildə bitib. Kitabın gec bir vaxtda ərsəyə gəlməsinə səbəb görkəmli rəssam Tahir Salahovun şəxsən iş prosesinə cəlb olunması idi”. Bu fikirləri səsləndirən kitabın müəllifi, müsiqişünas Raya Abbasova qeyd etdi ki, kitabda Prezident İlham Əliyev və Birinci vitse-prezident Mehriban Əliyevanın rəssama ünvanladığı təbrik məktubları da yer alıb.
Bakı Kitab Mərkəzinin direktoru Günel Rzayeva Tahir Salahovla bağlı xatirələrini bölüşdü, vaxtilə baş redaktoru olduğu jurnallarda ondan müsahibələr aldığını qeyd etdi. İçərişəhər Muzey Mərkəzinin direktoru Əminə Məlikova kitabın İçərişəhər Dövlət Tarix Memarlıq Qoruğu İdarəsinin dəstəyi ilə işıq üzü gördüyünü söylədi.
Azərbaycan Yazıçılar Birliyinin sədri, Xalq Yazıçısı Anar, Xalq rəssamı Arif Hüseynov, İnsan Hüquqları üzrə müvəkkil Səbinə Əliyeva, Tahir Salahov ev-muzeyinin direktoru Səadət Mirzəyeva “Dialoq” kitabının əhəmiyyətindən söz açdılar. Qeyd olundu ki, rəssam fəlsəfi düşüncələrini fırça ilə aydın şəkildə çatdıran qüdrətli sənətkar olub.
Ülviyyə Heydərova